అందుకోసమే పవన్ ను రేణుదేశాయ్ పొగిడేసిందా..?

Posted: 09/02/2014 04:45 PM IST

(Image source from: the reason behind why renu desai praises pawan kalyan on facebook)

టాలీవుడ్ పవర్ స్టార్ పవన్ కల్యాణ్ పుట్టినరోజు సందర్భంగా తాను దర్శకత్వం వహించిన ‘‘ఇష్క్ వాలా లవ్’’ మూవీ ట్రైలర్ ను విడుదల చేస్తున్నందుకు ఆ దేవుడు ఇచ్చిన వరంగా భావిస్తున్నానంటూ రేణుదేశాయ్ ఫేస్ బుక్ లో పవన్ ను పొగిడిన విషయం తెలిసిందే! అలాగే చిత్రనిర్మాణంలో పవన్ తనకు ఎంతగానో సహాయం చేశాడని.. పవన్ లాంటి మంచి టీచర్ ను తన జీవితంలో మరెవ్వరినీ చూడలేదంటూ పేర్కొంది. ఫిల్మ పరిపూర్ణతను సాధించడానికి సహకరించిన పవన్ కల్యాణ్ కు తానెప్పుడూ రుణపడి వుంటానని స్పష్టం చేసింది. తాను ఈ విధంగా చెప్పిన కామెంట్లను పవన్ కల్యాణ్ కు వినిపించినప్పుడు అతను కూడా నవ్వి ఊరుకున్నాడంటూ ఆమె అందులో తెలిపింది. ఏదైతేనేం.. రేణుదేశాయ్, పవన్ కల్యాణ్ ను ఇంతలా పొగడడాన్ని చూసి ఇండస్ట్రీ వర్గాల్లో రకరకాల పుకార్లు షికార్లు చేస్తున్నాయి.

రేణు దేశాయ్ మరాఠీ భాషలో ‘‘ఇష్క్ వాలా లవ్’’ అనే చిత్రానికి మొట్టమొదటిసారిగా దర్శకత్వం వహించిన విషయం తెలిసిందే! ఈ మూవీ టీజర్ ను ఆగస్టు 26న రిలీజ్ చేయాల్సి వున్నప్పటికీ.. కొన్ని అనివార్యకారణాల వల్ల పవన్ కల్యాణ్ పుట్టినరోజు సందర్భంగా విడుదల చేసింది రేణు! అయితే ట్రైలర్ ను విడుదల చేస్తూ.. పవన్ ను పొగడ్తలతో ముంచేసింది. పవన్ తనకు ఒక మంచి గురువు అంటూ తెగ పొగిడేసింది. అయితే తన తాజా చిత్రం ప్రమోషన్ లో భాగంగా టాలీవుడ్ లో కూడా బాగా పాపులర్ అవ్వాలనే నేపథ్యంలోనే రేణుదేశాయ్ ఈవిధంగా పవన్ కల్యాణ్ పొగుడేస్తోందని ఇన్ సైడ్ టాక్ జోరుగా నడుస్తోంది. టాలీవుడ్ లో పవన్ కల్యాణ్ ఫాలోయింగ్ ఎలా వుందో అందరికీ తెలిసిందే! పవన్ ఫాలోయింగ్ ను క్యాచ్ చేసుకోవడానికి తన చిత్రాన్ని టాలీవుడ్ లో కూడా రిలీజ్ చేయాలనే ఆశాభావంతోనే పవన్ మీద ప్రశంసలు కురిపించిందని చర్చించుకుంటున్నారు.

అలాగే.. పవన్ కల్యాణ్ కు ఇతరులకు సహాయం చేయడం ఎప్పటికీ ముందుంటాడు. ఈ తరుణంలోనే రేణు దేశాయ్ అతనికి దగ్గరయ్యి.. తన సినిమాను టాలీవుడ్ లో ప్రమోట్ చేసుకుంటే ఇక్కడ కూడా కలెక్షన్లు బాగానే వస్తాయని రేణు భావిస్తున్నట్టు తెలుస్తోంది. ఒకవేళ పవన్ ఆమె సినిమాకు మద్దతునిస్తే.. టాలీవుడ్ లో ఆటోమెటిక్ గా అది ప్రమోషన్ అయిపోతుంది. ఎందుకంటే పవన్ ఏది చేస్తే.. ఆయన అభిమానులు కూడా అదే చేస్తారు. పవన్ ఈ సినిమాకు మద్దతు పలికితే.. అభిమానులు ప్రమోషన్ చేస్తారు. పైగా రేణు చేసిన కామెంట్లకు పవన్ అభిమానులు కూడా హర్షం వ్యక్తం చేశారు. మొత్తానికి రేణు దేశాయ్ మంచి ఆలోచనే చేసిందంటూ సినీవిశ్లేషకులు చెప్పుకుంటున్నారు.