జయసుధ అక్కడికి రాలేదు.. ఎందుకంటే!

Posted: 04/17/2015 01:11 PM IST

Jayasudha not visits telugu film chambers maa elections results time

గతకొన్నాళ్ల నుంచి ఉవ్విళ్ళూరిస్తూ వచ్చిన ‘మా’ అధ్యక్ష ఎన్నికల పోటీల్లో నటకిరీటి రాజేంద్రప్రసాద్ గెలుపొందిన విషయం తెలిసిందే! అయితే రిజల్ట్ వెలువడక ముందు ఎవరు గెలుపొందుతారోనన్న టెన్షన్ తో రాజేంద్రప్రసాద్ ప్యానెల్, జయసుధ ప్యానెల్ కు సంబంధించిన అభ్యర్థులు అందరూ ఫిల్మ్ ఛాంబర్ దగ్గరికి చేరుకున్నారు. ఈ రెండు ప్యానెల్స్ లో రాజేంద్రప్రసాద్ తోపాటు ఆయన సభ్యులు సైతం హాజరయ్యారు గానీ.. జయసుధ ప్యానెల్ నుంచి తక్కువమంది హాజరవడంతోపాటు ముఖ్యంగా ఈ అధ్యక్ష బరిలో నిలిచిన అభ్యర్థి జయసుధ రాకపోవడం పలు అనుమానాలకు తావిస్తోంది.

ఈ ఎన్నికల్లో ఎవరు గెలుస్తారోనన్న విషయం జయసుధకు ముందే తెలసి వుంటుందని.. అందుకే ఆమె ఫిల్మ్ ఛాంబర్ దగ్గరికి రాలేదని కొందరు అభిప్రాయం వ్యక్తం చేస్తున్నారు. పైగా.. ఈ ఎన్నికల ముందు జయసుధపై, ఆమె ప్యానెల్ పై తీవ్ర ఆరోపణలు రావడంతోపాటు కాస్త బ్యాడ్ ఇమేజ్ వచ్చిందన్న విషయాన్ని జయసుధ గ్రహించి వుంటారని అంతా అనుకుంటున్నారు. అందరూ ముందుగా ఊహించినట్లుగానే ఈ ఎన్నికల్లో రాజేంద్రప్రసాద్ గెలుస్తారన్న సంగతి జయసుధ కూడా పసిగట్టి రాలేదని చెప్పుకుంటున్నారు. మరి.. ఈ విషయం తెలిసి కూడా ఆమె ఎన్నికల్లో ఎందుకు పోటీ చేశారో అర్థం కాని ప్రశ్నగా మిగిలిపోయిందని విశ్లేషకులు ఆందోళనల్లో మునిగిపోయారు.

మరోవైపు.. సాధారణ ఎన్నికలు ముగిసిన అనంతరం ఎగ్జిట్ పోల్స్ నిర్వహిస్తారు. అందులో ఎవరు గెలుపొందారోనన్న విషయం దాదాపు 90 శాతం వరకు తెలిసే అవకాశం వుంది. ఇలాగే ‘మా’ ఎన్నికల్లో కూడా ఎగ్జిట్ పోల్స్ నిర్వహించారా..? ఆ వివరాలు జయసుధకు తెలిశాయా..? అలా వివరాలు తెలిసిన నేపథ్యంలోనే ఈ ఎన్నికల్లో రాజేంద్రప్రసాద్ గెలుస్తారనే నమ్మకంతో ఆమె ఫిల్మ్ ఛాంబర్ కి హాజరు కాలేదా? అన్న అనుమానాలు వ్యక్తమవుతున్నాయి. అయితే.. ఆరోగ్య కారణాల రీత్యా ఆమెకు కాస్త రెస్ట్ అవసరం వుంది కాబట్టి.. ఛాంబర్ కి రాలేదని ఆమె సన్నిహిత వర్గాలు తెలుపుతున్నాయి. ఏదైతేనేం.. అత్యంత కీలకమైన ఎన్నికల రిజల్ట్ సమయంలో జయసుధ రాకపోవడం పెద్ద సంచలనంగానే మారింది.