నాగ్, కార్తీలు ‘ఊపిరి’తో రానున్నారా?

Posted: 08/24/2015 04:41 PM IST

‘ఎవడు’ చిత్రం తర్వాత దర్శకుడు వంశీ పైడిపల్లి దర్శకత్వంలో ఓ భారీ మల్టీస్టారర్ చిత్రం తెరకెక్కుతున్న విషయం తెలిసిందే. అక్కినేని నాగార్జున, తమిళ స్టార్ కార్తీ, మిల్కీ బ్యూటీ తమన్నా ప్రధాన పాత్రలలో తెరకెక్కుతున్న ఈ చిత్రాన్ని పి.వి.పి పతాకంపై ప్రముఖ నిర్మాత ప్రసాద్. వి. పోట్లూరి భారీ బడ్జెట్ తో నిర్మిస్తున్నారు.

ప్రస్తుతం ఈ చిత్ర షూటింగ్ లండన్ లో శరవేగంగా జరుగుతోంది. ఇందులో కార్తీ సరసన తమన్నా హీరోయిన్ గా నటిస్తుంది. అయితే నాగార్జునకు జోడిగా సౌత్ ఆఫ్రికన్ మోడల్ గాబ్రియేల్ల దిమెత్రియాడెన్ నటిస్తుంది. ఇప్పటికే వీరిద్దరిపై కొన్ని కీలక సన్నివేశాలను చిత్రీకరించారు.

ఈ చిత్రానికి ‘దోస్త్’ అనే టైటిల్ పెట్టబోతున్నట్లుగా గతకొద్దిరోజులుగా వార్తలొస్తున్నాయి. అయితే తాజాగా ఈ చిత్రానికి ‘ఊపిరి’ అనే టైటిల్ పరిశీలిస్తున్నట్లుగా తెలిసింది. భారీ బడ్జెట్ తో తెలుగు, తమిళం భాషలలో రూపొందుతున్న ఈ చిత్రాన్ని ఏకకాలంలో రెండు భాషలలో విడుదల చేయనున్నారు. ఈ చిత్రానికి గోపిసుందర్ సంగీతం అందిస్తున్నారు.