సత్యమేవ జయతే కాదు.. ‘సత్యాగ్రహి’

Posted: 01/08/2016 01:55 PM IST

పవర్ స్టార్ పవన్ కళ్యాణ్ హంగామా త్వరలోనే బుల్లితెరమీద మొదలుకానుంది. ఇప్పటివరకు పవన్ కళ్యాణ్ నటించిన సినిమాలను వెండితెర మీద చూసాం, అదే విధంగా ఆయన సినిమాలను, ఇంటర్వ్యూలను బుల్లితెర మీద చూసాం కానీ స్పెషల్ గా పవన్ కళ్యాణ్ తో ఎలాంటి ప్రొగ్రాంలు బుల్లితెరపై రాలేవు.

అలాంటిది త్వరలోనే పవన్ కళ్యాణ్ బుల్లితెరపై సందడి చేయబోతున్నాడని తెలిసింది. ప్రస్తుతం తెలుగు ఇండస్ట్రీలో వినబడుతున్న హాట్ టాపిక్ ఇదే. హిందీలో అమీర్ ఖాన్ వ్యాఖ్యాతగా వ్యవహరిస్తున్న ‘సత్యమేవ జయతే’ కార్యక్రమం ఎంత సక్సెస్ సాధించిందో అందరికి తెలిసిందే. ఇదే కార్యక్రమాన్ని పలు భాషలకు డబ్బింగ్ చేసి ప్రసారం చేయగా, అక్కడ కూడా మంచి సక్సెస్ ను సొంతం చేసుకుంది.

ఇదిలా వుంటే ఈసారి నేరుగా ‘సత్యమేవ జయతే’ కార్యక్రమాన్ని నేరుగా తెలుగులో రూపొందించడానికి ప్రయత్నాలు జరుగుతున్నాయి. పవన్ కళ్యాణ్ కు ఈటీవి ఛానెల్ యాజమాన్యం రామోజీరావుతో మంచి స్నేహం వుంది. అందుకే ఈ కార్యక్రమాన్ని ఈటీవిలో ప్రసారం చేయడానికి సన్నాహాలు జరుగుతున్నట్లుగా వార్తలొస్తున్నాయి. తెలుగులో ఈ కార్యక్రమానికి ‘సత్యాగ్రహి’ అనే టైటిల్ ను పరిశీలిస్తున్నారు. ఎందుకంటే సమాజం కోసం పవన్ కళ్యాణ్ గతంలో ‘సత్యాగ్రహి’ అనే సినిమా తీయాలనుకున్నారు. కానీ ఆ సినిమా అనివార్య కారణాల వల్ల ఆగిపోయింది. కానీ ఆ టైటిల్ చాలా పాపులర్ అయ్యింది. కాబట్టి ఇప్పుడు అదే పేరును ఈ షో కోసం పెట్టనున్నారని తెలిసింది.

అసలే పవన్ కళ్యాణ్ సత్యం, ధర్మం, అహింస...అనే సిద్ధాంతాలను ఖచ్చితంగా పాటిస్తూ వుంటాడు. ఇక ప్రజల కష్టాలను తీర్చాడానికి ఇటీవలే ‘జనసేన’ పార్టీని స్థాపించి, ప్రజల సమస్యలను తెలుసుకొని ప్రభుత్వం ద్వారా ఆ సమస్యలను తీర్చడానికి ఓ సైనికుడు/శ్రామికుడిగా కృషిచేస్తున్నాడు. అలాంటి ‘సత్యమేవ జయతే’ వంటి ప్రజల సమస్యలను తెలుసుకొనే కార్యక్రమంలో పవన్ కళ్యాణ్ ఖచ్చితంగా పాల్గొనబోతున్నాడని సమాచారం.

త్వరలోనే ఈ కార్యక్రమం సెట్స్ పైకి వెళ్లనుందని, ప్రస్తుతం ఇందుకు సంబంధించిన ఏర్పాట్లన్నీ కూడా జరుగుతున్నాయని, త్వరలోనే అన్ని వివరాలను అధికారికంగా తెలియనున్నాయని సమాచారం. ఇదిలా వుంటే ప్రస్తుతం పవన్ కళ్యాణ్ సినిమా షూటింగ్ లోనూ మరియు రాజకీయ సమావేశాలతో బిజీగా వున్నారని.. అందువల్ల ఈ కార్యక్రమంలో పవన్ కళ్యాణ్ పాల్గొనడని కొంతమంది అభిప్రాయపడుతున్నారు. మరి ఏం జరుగనుందో చూడాలి.

పవర్ స్టార్ టీవిల్లో రాబోతున్నాడంటే అందరికి సంతోషమే కదా! ఒకవేళ ఈ కార్యక్రమంలో పవన్ కళ్యాణ్ నిజంగా చేస్తే ప్రజల సమస్యలను నేరుగా తెలుసుకోవడానికి ఈ వేదిక చాలా ఉపయోగపడుతుంది. మరి ఈ విషయంపై పవన్ ఎలాంటి నిర్ణయం తీసుకోబోతున్నాడో చూడాలి. ప్రస్తుతం పవన్ కళ్యాణ్ నటిస్తున్న ‘సర్దార్ గబ్బర్ సింగ్’ సినిమా షూటింగ్ శరవేగంగా జరుగుతోంది. త్వరలోనే ప్రేక్షకుల ముందుకు రానుంది.