Posted: 03/16/2013 05:56 PM IST

పరస్పర అంగీకారంతో శృంగారంలో పాల్గొనడానికి కనీస వయస్సును 18ఏళ్ల నుంచి 16ఏళ్లకు కుదిస్తూ కేంద్ర కేబినెట్ తీసుకున్న నిర్ణయం పట్ల సర్వత్రా నిరసన వ్యక్తమవుతోంది. ఇది పెళ్లికి ముందే సెక్స్‌ను ప్రోత్సహించడమని, అమ్మాయిల రక్షణ మరింత ప్రశ్నార్థకంగా మారే అవకాశముంటుందని మహిళా సంఘాలు అంటున్నాయి. ఇది పిల్లల్లో అన్యధోరణులకు దారితీసే అవకాశముందని తల్లిదండ్రులు ఆందోళనచెందుతున్నారు. పెళ్లికి పద్దెనిమి సంవత్సరాల వయస్సు నిర్ణయించినప్పడు సెక్స్‌కు 16 సంవత్సరాలేంటని ప్రశ్నిస్తున్నారు. కొందరు సామాజిక కార్యకర్తలు మాత్రం అందులో పదహారేళ్లలో సెక్స్‌లో పాల్గొనడం తప్పుకాదంటున్నారు. నగరంలో సెక్స్‌లో పాల్గొంటున్న 16 ఏళ్లలోపు బాల బాలికలు పది శాతం పైనే ఉన్నట్లు సర్వేలు చెబుతున్నాయి.నేర న్యాయ చట్టం (సవరణ) బిల్లు-2013 తుది ముసాయిదాను కేంద్ర మంత్రివర్గం ఆమోదించింది. ఈ నెల 22న పార్లమెంటు సమావేశాలకు విరామం ఇస్తున్న నేపథ్యంలో రెండు రోజుల ముందే దీన్ని చర్చకు పెట్టాలని ప్రభుత్వం భావిస్తోంది.నిర్భయ కేసు నేపథ్యంలో వర్మ కమిటీ సిఫారసుల ఆధారంగా సెక్స్‌కు సమ్మతి తెలిపే వయస్సును 18 నుంచి 16 ఏళ్లకు తగ్గిస్తూ కేంద్రం నిర్ణయం తీసుకుంది. ది ప్రొటక్షన్ ఆఫ్ చ్రిల్డన్ అగెనెస్ట్ సెక్సువల్ అఫెన్స్ యాక్ట్ 18 సంవత్సరాల లోపు పిల్లలను మైనర్‌లుగా అభివర్ణిస్తోంది. కేంద్రం నిర్ణయం నేపథ్యంలో మరోమారు 16 సంవత్సరాల వయస్సున్నవారిని పిల్లలుగా గుర్తించాలా లేక పరిపక్వత చెందిన వ్యక్తులుగా పరిగణించాలనే ప్రశ్నతలెత్తుతోంది.

పదహారేళ్ల వయస్సులో శృంగారంలో పాల్గొనడం సబబే అని అంగీకరిస్తే.... ఆ వయస్సు అమ్మాయిలపై పెద్ద వయస్సు వారు చేసే లైంగిక దాడికి పాల్పడితే పరిస్థితి ఏమిటి? దాన్ని బాలికపై రేప్‌గా పరిగణిస్తారా? లేదంటే అది నిందితుడికి అనుకూలంగా మారే అవకాశం ఉంటుందని పలువురు అభిప్రాయపడుతున్నారు. పరస్పర అంగీకారంతో ఒకే ఏజ్‌గ్రూప్‌కు చెందిన వారు శృంగారంలో పాల్గొనవచ్చు. కానీ ఏ 40ఏళ్ల వ్యక్తో అత్యాచారానికి పాల్పడి అది పరస్పర అంగీకారంతో జరిగిందని తప్పించుకుంటే పరిస్థితి ఏంటి అని జ్యోతి అనే సాఫ్ట్‌వేర్ ఉద్యోగిని అంటున్నారు. మొత్తంగా ఈ విషయంలో భిన్న వాదనలు వినిపిస్తున్నప్పటికీ కేంద్రం నిర్ణయం పట్ల తల్లిదండ్రులు ఆగ్రహం వ్యక్తం చేస్తున్నారు.