Posted: 06/22/2012 06:49 PM IST

ఈఏడాది వరుసగా స్విస్ ఓపెన్, థాయిలాండ్ ఓపెన్, ఇండోనేషియా ఓపెన్ టోర్నీల్లో టైటిళ్లు గెల్చుకున్న భారత బాడ్మింటన్ స్టార్, డక్కన్ క్రానికల్ బ్రాండ్ అంబాసిడర్ సైనా నెహ్వాల్‌కు ప్రభుత్వం తరఫున 50 లక్షల నగదు ప్రోత్సాహాన్ని ముఖ్యమంత్రి ఎన్. కిరణ్ కుమార్ రెడ్డి ప్రకటించారు. దేశానికి, ముఖ్యంగా మన రాష్ట్రానికి ఆమె వనె తెచ్చిందని ముఖ్యమంత్రి విడుదల చేసిన ఒక ప్రకటనలో పేర్కొన్నారు. వరుస విజయాలతో దూసుకెళుతున్న సైనా రానున్న లండన్ ఒలింపిక్స్‌లోనూ ఇదే జోరును కనబరచి స్వర్ణ పతకాన్ని కైవసం చేసుకుంటారన్న ఆశాభావం వ్యక్తం చేశారు.

ఇండోనేసియా ఓపెన్ టైటిల్ గెల్చుకొచ్చిన సైనా విషయంలో ఆగమేఘాల మీద స్పందించిన రాష్ట్ర ప్రభుత్వం క్రీడాకారులందరిపట్లా అదే దూకుడును ప్రదర్శించడంలేదు. మన రాష్ట్రానికే చెందిన నాగలక్ష్మి కబడ్డీ ప్రపంచకప్ గెల్చిన జట్టులో సభ్యురాలు. మార్చిలో ప్రపంచకప్ జరిగితే ఆమెకు ఇంతవరకూ ఒక్క పైసా కూడా విదల్చలేదు. వరల్డ్‌కప్ గెలవగానే ఆమె ముఖ్యమంత్రి కిరణ్‌కుమార్‌రెడ్డి, క్రీడామంత్రి వట్టి వసంతకుమార్‌ను కలిసింది.

తప్పకుండా న్యాయం చేస్తామని మాటిచ్చారు కూడా. అయితే అదంతా మాటలకే పరిమితమైంది. తర్వాత ఎన్నిసార్లడిగినా రేపనీ మాపనీ దాటవేయడం మినహా నగదు ప్రోత్సాహకం మాత్రం ప్రకటించలేదు. పతకం గెలిచి రాగానే రాష్ట్ర ప్రభుత్వం తరపున వట్టి వసంతకుమార్.. సైనాను అభినందించేందుకు మీడియా సమావేశాన్ని ఏర్పాటు చేశారు. ప్రభుత్వం సైనా విషయంలో చూపిన ఉత్సాహంలో కొంతైనా తనపట్ల చూపినా చాలని నాగలక్ష్మి ఆవేదన వ్యక్తం చేసింది. సైనాకు ఇచ్చినందుకు తనకు బాధలేదని, అయితే తానేం పాపం చేశానో చెప్పాలని ఆమె ప్రశ్నిస్తోంది.వరల్డ్‌కప్ గెల్చుకుని హైదరాబాద్ వచ్చినపుడు తనను ఒక్కరు కూడా అభినందించలేదని, తానే అందరివద్దకూ వెళ్లానని ఆమె చెప్పుకొచ్చింది. గ్రామీణ ప్రాంతానికి చెందిన తాను కుటుంబ, ఆర్ధిక సమస్యలున్నా ఎన్నో కష్టనష్టాలకోర్చి అంతర్జాతీయ స్థాయికి ఎదిగానని చెప్పింది.అయినా ఇంత నిరాదరణ ఎదురవుతుందని కలలోనైనా ఊహించలేదని నాగలక్ష్మి ఆవేదన వ్యక్తంచేసింది. ప్రకాశం జిల్లా ఇంకొల్లుకు చెందిన నాగలక్ష్మి రైల్వే క్లర్క్ (పాట్నాలో)గా ఉద్యోగం చేస్తోంది.