Posted: 06/23/2012 01:52 PM IST

ఒలింపిక్స్‌లో పాల్గొనే భారత టెన్నిస్ జట్టుకు ఎంపిక కావడం ఒకవైపు ఆనందంగానూ, మరోవైపు ఆశ్చర్యంగానూ ఉందని జె విష్ణువర్ధన్ అన్నాడు. లియాండర్ పేస్‌కు జోడీగా ఒలింపిక్స్ డబుల్స్ జట్టుకు విష్ణువర్ధన్‌ను ఎంపిక చేసినట్టు ఎఐటిఎ చేసిన ప్రకటనపై అతను స్పందిస్తూ ఒత్తిళ్లను అధిగమించడం ఎలాగో తనకు తెలుసునని అన్నాడు. ప్రత్యేక శిక్షణ ఇచ్చేందుకు విశాఖకు వచ్చిన విష్ణువర్ధన్‌ను కలసిన విలేఖరులతో అతను మాట్లాడుతూ తొలిసారిగా ఒలింపిక్ పోటీలకు ఎంపిక కావడం ఆనందంగా ఉందన్నాడు. టెన్నిస్ క్రీడా రంగంలో అనూహ్య పరిణామాలు నెలకొనడంతో తనకు ఈ అవకాశం లభించిందన్నాడు. ఇది తాను ఊహించలేదన్నాడు. ఈ నిర్ణయం తనకు ఎంతో స్ఫూర్తిని అందించిందని చెప్పాడు. రెండున్నరేళ్ళుగా తాను మంచి ఆటను ప్రదర్శిస్తున్నానని, ఇటీవల బెంగుళూరు, మైసూర్‌లో జరిగిన రెండు ఐటిఎఫ్ టోర్నమెంట్‌లలో టైటిల్స్ గెల్చుకోవడంతో పాటు, తాను చూపే నైపుణ్యాన్ని దృష్టిలో పెట్టుకుని తనకు ఈ అవకాశం కల్పించి ఉంటారని అభిప్రాయపడ్డాడు.