పాక్ క్రికెటర్లతో చిందులేసిన సానియా

Posted: 07/21/2015 11:26 AM IST

Sania mirza dubsmash husband shoaib malik pakistan cricketers

భారత టెన్నిస్ స్టార్ సానియా మీర్జా ఇండియా అభిమానులకు షాక్ తగిలేలా పాక్ క్రికెటర్లతో కలిసి చిందులేసింది. పైగా.. తాను చిందేసిన ఆ వీడియోని నెట్ లో అప్ లోడ్ చేసింది కూడా! ఇప్పుడు ఆ వీడియో ఇంటర్నెట్ లో తెగ హల్ చల్ చేస్తోంది. ఇంతకీ సానియా అలా పాక్ క్రికెటర్లతో ఎందుకు స్టెప్పులేసింది..? అనేగా సందేహం! ఆ వివరాలు తెలియాలంటే మేటర్ లోకి వెళ్లాల్సిందే!

కొలంబో వేదికగా ఆదివారం శ్రీలంక, పాకిస్థాన్ జట్ల మధ్య మ్యాచ్ జరిగింది. ఆ మ్యాచ్ లో పాక్ జట్టు నెగ్గి, సిరీస్ ని చేజిక్కించుకుంది. దీంతో పాక్ జట్టు ఆటగాళ్లు సంబరాలు చేసుకున్నారు. ఇక ఈ మ్యాచ్ ను వీక్షించేందుకు కొలంబో వెళ్లిన సానియా కూడా.. పాక్ జట్టు గెలుపొందడంతో ఆ జట్టుతో కలిసి చిందులేసింది. సానియా వారితో కలిసి చిందులేసిన డబ్ స్మాష్ వీడియో ప్రస్తుతం నెట్ లో హల్ చల్ చేస్తోంది. ఆ వీడియోలో ఆమె తన భర్త షోయబ్ తోపాటు పాక్ క్రికెటర్లతో కలిసి కనిపించింది. తమ జట్టు విజయం సాధించిన సంతోషంలో మాలిక్, సానియ దంపతులు ఆ జట్టు సభ్యులతో కలిసి ‘అభీతో పార్టీ షురూ హుయీ హై’ అనే పాటకు డబ్ స్మాష్ వీడియో చిత్రీకరించారు. ఇప్పుడు ఈ వీడియో మీద తీవ్రస్థాయిలో చర్చలు కొనసాగుతున్నాయి.

ఆ వీడియోని వీక్షించిన నెటిజన్లు.. ఇండియాకు చెందిన సానియా పాక్ ఆటగాళ్లతో స్టెప్పులేయడం ఏంటని ప్రశ్నలు సంధిస్తున్నారు. మరికొందరు మాత్రం సానియా అలా చిందులేయడంలో తప్పులేదని చెప్పుకుంటున్నారు. ఎందుకంటే.. పాక్ జట్టులో సానియా భర్త షోయబ్ మాలిక్ కూడా వున్నాడు కాబట్టి!