జూన్ 4న కూడా నా ముందు కోహ్లీ నిలబడలేడు

Posted: 05/28/2017 01:40 PM IST

టీమిండియా కెప్టెన్ విరాట్ కోహ్లీ ప్రతిభను యావత్ ప్రపంచ క్రికెట్ దిగ్గజాలు ప్రశంసించి, అభినందలతో ముంచెత్తుతున్న తరుణంలో.. దయాధి పాకిస్థాన్ దేశానికి చెందిన పేసర్ మాత్రం కోహ్లీ తన బౌలింగ్‌ ధాటికి నిలబడలేడని అన్నాడు. ఇంతకీ ఎవరతను అంటున్నారా.. అతనే జునైద్ ఖాన్. వచ్చే నెల 1వ తేదీ నుంచి ఐసీసీ చాంపియన్స్ ట్రోఫీ ప్రారంభం కానున్న విషయం తెలిసిందే. ఈ సందర్భంగా ఓ పత్రికకు ఇచ్చిన ఇంటర్వూలో జునైద్‌ పై విధంగా స్పందించాడు. కోహ్లీ తనను ఎదుర్కొన్న నాలుగు మ్యాచ్‌ల్లో మూడుసార్లు ఔటైన విషయాన్ని ప్రస్తావించాడు.

చాంపియన్స్ ట్రోఫీలో కూడా ఇదే పునరావృతం అవుతుందని విశ్వాసాన్ని వ్యక్తం చేశాడు. 'వాస్తవానికి కోహ్లీ గొప్ప బ్యాట్స్‌మనే.. కానీ, నా వద్దకు వచ్చే సరికి అతని ఎత్తులు పారడం లేదు' అని అన్నాడు. కోహ్లీ కంటే తాను మానసికంగా బలంగా ఉన్నానని చెప్పాడు. కాగా, కోహ్లీ, జునైద్‌ను ఎదుర్కొని నాలుగు సంవత్సరాలు అవుతోంది. ఎడమ చేతి వాటం గల ఈ పేసర్‌ అద్భుత ఆటతీరుతో ఆకట్టుకుంటున్న విషయం తెలిసిందే.