టీమిండియా మాజీ కెప్టెన్ పై చీటింగ్ కేసు

Posted: 01/23/2020 08:33 PM IST

Case against mohammed azharuddin 2 others for cheating travel agent

టీమిండియా మాజీ కెప్టెన్ హైదరాబాద్ క్రికెట్ అసోసియేషన్ అధ్యక్షుడు అయిన మహమ్మద్ అజారుద్దీన్ పై చీటింగ్ కేసు నమోదైంది. తమ ట్రావెల్స్ నుంచి వివిధ ప్రాంతాలకు విమాన టికెట్లు కోనుగోలు చేసిన ఆయన వాటికి సంబంధించిన మొత్తాన్ని చెల్లించకపోవడంతో ఆయనపై పోలీసులు చీటింగ్ కేసు నమోదే చేసి ఎఫ్ఐఆర్ కూడా రిజిస్టర్ చేశారు. ఈ కేసులో అజారుద్దీన్ తో పాటు మరో ఇద్దరు వ్యక్తులపై కూడా మహరాష్ట్ర పోలీసులు కేసు నమోదు చేశారు.

మహారాష్ట్రలోని ఔరంగాబాద్ పోలీస్ స్టేషన్లో నమోదైన ఎఫ్ఐఆర్ మేరకు వివరాలు ఇలా వున్నాయి. అజారుద్దీన్ సహా మరో ఇద్దరు వ్యక్తులు కలిసి తనను 20 లక్షల మేర మోసం చేశారు అంటూ.. దానిష్ ట్రావెల్స్ ద్వారా వివిధ ప్రాంతాలకు విమాన ప్రయాణాలను అజారుద్దీన్ టికెట్లు బుక్ చేశారని.. దానికి సంబంధించి రూ.20 లక్షలు చెల్లించకుండా మోసం చేశారని ఫిర్యాదులో పేర్కొన్నారు. ఆ వ్యక్తి ఫిర్యాదు మేరకు అజారుద్దీన్ సహా మరో ఇద్దరు వ్యక్తుల పై ఔరంగాబాద్ పోలీసులు ఎఫ్ఐఆర్ నమోదు చేశారు.

ఇక ఔరంగాబాద్ పోలీస్ స్టేషన్లో తన పై చీటింగ్ ఆరోపణలతో కేసు నమోదు చేయడంపై అజారుద్దీన్ స్పందించారు. ఎవరో తప్పుడు ఆరోపణలు చేస్తే... ఎలాంటి విచారణ జరపకుండా తన పై ఎఫ్ఐఆర్ ఎలా నమోదు చేస్తారు అంటూ పోలీసులను ప్రశ్నించారు మహమ్మద్ అజారుద్దీన్. పోలీసులు ప్రస్తుతం తనపై వచ్చిన ఆరోపణలపై విచారణ జరపాలని డిమాండ్ చేశారు. హైదరాబాద్ క్రికెట్ అసోసియేషన్ అధ్యక్షుడిగా ఉన్న తన పరువు పోయేలా ఆరోపణలు చేసిన వ్యక్తి పై రూ. 100 కోట్ల పరువు నష్టం దావా వేస్తానని హెచ్చరించారు.