నగరంలో ఎన్టీఆర్ జోరు

Posted: 11/19/2013 11:36 AM IST

ఎన్టీఆర్ కథానాయకుడిగా సాయి గణేష్ ప్రొడక్షన్స్ పతాకంపై బెల్లంకొండ సురేష్ ఓ భారీ చిత్రాన్ని నిర్మిస్తున్నారు. ‘కందిరీగ’ ఫేమ్ సంతోష్ శ్రీనివాస్ దర్శకత్వం వహిస్తున్నాడు. ఈ సినిమాకు ‘రభస’, ‘జోరు’ అనే టైటిల్స్ వినిపిస్తున్న విషయం తెలిసిందే. అయితే ఈ రెండింటిలో చిత్ర యూనిట్ ‘జోరు’ టైటిల్‌పైపే మొగ్గు చూపడంతో ఈ చిత్రానికి ఆ టైటిల్‌నే ఖరారు చేయాలన్న ఆలోచనకు దర్శకనిర్మాతలు వచ్చినట్టు తెలిసింది.

 

గత కొన్ని రోజుల క్రితం తొలి షెడ్యూల్ పూర్తి చేసుకున్న ఈ సినిమా షూటింగ్ అనివార్యకారణాల వల్ల అర్థాంతరంగా ఆగిపోయిందని ఇటీవల వార్తలు వినిపించాయి. అయితే తాజా సమాచారం ప్రకారం ఈ సినిమా షెడ్యూల్ ఈ నెల 19 నుంచి హైదరాబాద్‌లో ప్రారంభమవుతోందని తెలిసింది. కథలో కీలక మార్పుల కారణంగా సినిమా షూటింగ్‌ను గత కొన్ని రోజులగా వాయిదా వేస్తూ వస్తున్నారని, ప్రస్తుతం అన్నీ సర్దుకోవడంతో రెండవ షెడ్యూల్‌ను ప్రారంభిస్తున్నారని చిత్ర వర్గాల సమాచారం. ఇందులో ఎన్టీఆర్‌కు జోడీగా సమంతా, ప్రణీత నటిస్తున్నారు.

 

‘ఆది’ తరువాత బెల్లంకొండ సురేష్, ఎన్టీఆర్‌ల కలయికలో వస్తున్న సినిమా కావడంతో ఈ సినిమాపై ప్రేక్షకుల్లో భారీ అంచనాలు నెలకొన్నాయి. ఆ అంచనాలకు ఏ మాత్రం తగ్గకుండా సినిమా వుంటుందని, ఇందులో ఎన్టీఆర్ పాత్ర బాధ్యతతో కూడుకుని ఉంటుందని దర్శకుడు తెలిపారు.