విజయవాడ అందాలను రెట్టింపు చేసేందుకు అడ్డాల ప్లాన్

Posted: 05/27/2015 07:19 PM IST

Srikanth addala vijayawada tour for mahesh babu bramahotsavam movie

ప్రేమలో దాగివున్న ‘కొత్తబంగారు లోకాన్ని’ చూపించిన దర్శకుడు శ్రీకాంత్ అడ్డాల.. అదేవిధంగా కుటుంబంలో ప్రేమానురాగాలు ఎలా వుంటాయో కళ్లకు అద్దినట్లుగా ‘సీతమ్మ వాకిట్లో సిరిమల్లె చెట్టు’ సినిమా ద్వారా చూపించాడు. ఆ రెండు సినిమాలో తన దర్శకత్వం మార్క్ ఏంటో నిరూపించుకుని.. టాలీవుడ్ లో తనకంటూ ప్రత్యేక గుర్తింపు సంపాదించుకున్నాడు. దీంతో ఇతను కూడా పెద్ద దర్శకుల జాబితాలోకి చేరిపోయాడు.

ప్రస్తుతం ఈ సెన్సిబుల్ డైరెక్టర్ మరోసారి మహేష్ బాబుతో కలిసి ‘బ్రహ్మోత్సవం’ చిత్రాన్ని రూపొందించనున్న విషయం తెలిసిందే! ప్రతిష్టాత్మక పీవీపీ సినిమా పతాకంపై ప్రసాద్ వి. పొట్లూరి ఈ సినిమాను నిర్మిస్తున్నారు. మే 31న లాంచ్ కానున్న ఈ సినిమాకు సంబంధించిన ప్రీ ప్రొడక్షన్ కార్యక్రమాలు శరవేగంగా జరుగుతున్నాయి. ముఖ్యంగా ఈ సినిమా కోసం దర్శకుడు శ్రీకాంత్ అడ్డాల ఈ మూవీకి సినిమాటోగ్రాఫర్ గా పనిచేయనున్న రత్నవేలుతో కలిసి లొకేషన్ల వేటలో పడ్డారని సమాచారం!

విజయవాడ నేపథ్యంలో తెరకెక్కనున్న ఈ మూవీకోసం ప్రకాశం బ్యారేజీ, కనకదుర్గ ఆలయంలతోపాటు విజయవాడ పరిసరాలను దర్శకుడు, సినిమాటోగ్రాఫర్ ఓసారి పరిశీలించారు. విజయవాడను ఇంతకుముందెన్నడూ చూడనంత అందంగా ఈ సినిమాలో చూపించేందుకు శ్రీకాంత్ అడ్డాల సిద్ధమయ్యారట. ఇక ఈ సినిమాలో హీరోయిన్‌గా రకుల్‌ప్రీత్ సింగ్‌ను ఎంపిక చేసినట్లు తెలుస్తోంది. మిక్కీ జే మేయర్ ఈ సినిమాకు సంగీతాన్ని సమకూర్చనున్నారు.