సాధారణంగా కొత్త ఇంటి నిర్మాణాలను చేపట్టేముందు ప్రతిఒక్కరు తమకు అనుగుణంగా అన్ని కార్యక్రమాలను ముగించుకుంటారు. ఆధ్యాత్మిక సలహాలను కూడా పండితులు లేదా జ్యోతిష్య నిపుణుల నుంచి తీసుకుంటారు. కానీ కొన్ని సందర్భాలలో వాటి అమరికను సరిగ్గా పొందుపరుచుకోవడంలో విఫలం అవుతున్నారు. వీటివల్ల అనేక అనర్థాలు జరుగుతాయి. ముఖ్యంగా సంతానం కలగకపోవడం, ఆర్థికపరమైన ఇబ్బందులు, తరుచూ కుటుంబసభ్యుల మధ్య గొడవలు వంటి పరిణామాలను ఎదుర్కోవలసి వస్తుంది. కాబట్టి ఇంటిని నిర్మించుకునే ముందు సరిగ్గా లెక్క తే్ల్చుకుని వాస్తుప్రకారం సక్రమంగా కార్యక్రమాలను నిర్వహించుకుని, ఇంటిని నిర్మించుకోవాలి.

వాస్తుకు అనుగుణంగా ఇంటిని నిర్మించుకోవడం ద్వారా కోరుకున్న కోరికలతోపాటు... కొన్ని అసాధారణమైన మంచి ఫలితాలు కలుగుతాయి. అందులో భాగంగా సంతానం లేని వారికి వాస్తుప్రకారం నిర్మించిన ఇంట్లో నివాసం ఏర్పరుచుకుంటే.. వారికి ఖచ్చితంగా పిల్లలు పుడతారని జ్యోతిష్య నిపుణులు పేర్కొంటున్నారు. భారత ఆధ్యాత్మికవేత్త అయిన స్వామివివేకానంద కూడా వాస్తు గురించి మాట్లాడుతూ... ‘‘ప్రకృతిని మించిన గురువు లేడు’’ అని పేర్కొన్నారు. దీనిని క్లుప్తంగా పరిశీలిస్తే.. మన అలవాట్లు, ఆలోచనా విధానాలు మన చుట్టూ వున్న పంచభూతాల ప్రభావాల వల్ల నిత్యం మారుతుంటాయి. మనకు తెలియకుండానే వాటిని అనుగుణంగా మారిపోతుంటాం.

అదేవిధంగా వికృతంగా వున్న ప్రకృతి పరిసరాలలో (వాస్తుకు వ్యతిరేకంగా) గృహ సముదాయాలు కనుక వుంటే.. వాటి మధ్య సామాజిక సంఘర్షణలు, అనేక రకాల ఇబ్బందులు పుట్టుకొస్తాయి. ఒకరిమధ్య ఒకరికి సరైన సఖ్యత కుదరక అనేక వ్యతిరేక భావాలను ఎదుర్కోవలసి వస్తుంది. మానసికంగా ఒత్తిళ్లను భరించాల్సి వస్తుంది.

తాజాగా జ్యోతిష్య నిపుణులు వాస్తు గురించి వెల్లడించిన అంశాలు ఏమిటంటే... వాస్తు ప్రకారం గృహాలను నిర్మించుకుంటే సంతానం కలుగుతుంది. ఉపకారాలు చేసే మహాత్ముడైనా, సంఘ విద్రోహక చర్యలకు పాల్పడే మనుష్యులైనా పురుడు పోసుకోవాల్సింది (జన్మించడం) ఏదో ఒక గృహంలో లేదా గూటిలోనే! పిల్లలు పుట్టిన వెంటనే అతని చుట్టూ వున్న పరిసరాల గుణాలు.. పెద్దయిన తరువాత అతని జీవితంపై ఖచ్చితంగా ప్రభావితం చూపుతాయి. ఆ నేపథ్యంలో వాస్తుప్రకారం ఉత్తమ ఇంటిని నిర్మించుకుంటే.. ఉత్తమమైన సంతానం కలుగుతుంది.