తీపికరమైన నువ్వుల లడ్డు తయారీ

Posted: 08/21/2015 06:32 PM IST

Nuvvula laddu making method naga panchami special food

భారతీయ వంటకాల్లో చాలా అరుదుగా వినియోగించే పదార్థాల్లో ‘నువ్వులు’ ఒకటి. వీటిని కేవలం పండుగల సమయాల్లో మాత్రమే ఎక్కువగా వాడుతారు. వీటితో తయారుచేసే ఆహారాలు ఆరోగ్యానికి ఎంతో మేలు కూడా. ఎందుకంటే వీటి గింజల్లో 6 ఫ్యాటీ యాసిడ్స్, ఫ్లెవనాయిడ్ ఫినోలిక్ యాంటీఆక్సిడెంట్స్, విటమిన్స్, డైటేరియన్ ఫైబర్ వంటివి పుష్కలంగా వుంటాయి. ఇన్ని పోషకాలు కలిగిన ఈ నువ్వులు డయాబెటిస్, రొమటాయిడ్ ఆర్థ్రైటిస్, ఓరల్ హెల్త్, జలబు, చుండ్రు, చర్మ తదితర సమస్యలను తగ్గించడంలో కీలకపాత్ర పోషిస్తాయి. ఇలా ఎన్నో ఆరోగ్య ప్రయోజనాల్ని కలిగించే ఈ నువ్వులతో లడ్డూలు చేసుకుని తింటే ఎంతో శ్రేయస్కరం. మరి.. వాటిని ఎలా చేస్తారో తెలుసుకుందామా..

కావలసిన పదార్థాలు :
తెల్ల నువ్వులు - 1cup;
బెల్లం: 1/2cup;
ఖర్జూరం - 1 cup;
ఎండుకొబ్బరి తురుము- 1/4cup;
వేరుశెనగపప్పు - 1cup;
జీడిపప్పు - 1/2cup;
గసగసాలు - 2tbps;
ఎండుద్రాక్ష - 1/2cup;
యాలకులు - నాలుగు.

తయారు చేసే విధానం :
* ముందుగా స్టౌవ్ మీద పాన్ పెట్టి అందులో కొద్దిగా నూనె వేసి కాగపెట్టాలి. నూనె వేగిన తర్వాత అందులో నువ్వులు వేసి దోరగా వేయించి విడిగా పెట్టుకోవాలి.
* ఏ విధంగా అయితే నువ్వులను దోరగా వేయించి పక్కన పెట్టుకున్నారో అలాగే వేరుశెనగపప్పు, గసగసాలు కూడా విడివిడిగా వేయించి పక్కన పెట్టుకోవాలి.
* ఆ విధంగా వేయించిన ఆ మూడు పదార్థాలు చల్లారిన తర్వాత వాటిని మిక్సిలో వేసి పొడిగా చేసుకోవాలి. అలాగే యాలకలు, బెల్లం కూడా పొడి చేసుకోవాలి.
* ఇప్పుడు ఖర్జూరం మిక్సీలో వేసి మెత్తగా చేసుకోవాలి. తర్వాత ఖర్జూరం ముద్దలో నువ్వులు, గసగసాలు, పల్లీలతో చేసిన పొడి, కొబ్బరి తురుము, యాలకలపొడిని వేసి బాగా కల గలపాలి.
* అరగంట అలాగే ఉంచి ఉండలుగా చేసుకుంటే తియ్యనైన నువ్వుల లడ్డులు రెడీ.