Posted: 04/04/2013 06:16 PM IST

దుర్గామల్లేశ్వరస్వామివార్ల దేవస్థానంలో 11 నుంచి 20వ తేదీ వరకూ అమ్మవారి వసంత నవరాత్రోత్సవాలు, 21 నుంచి 29 వరకూ చైత్రమాసం బ్రహ్మోత్సవాలు జరుగుతాయని ఆలయ వైదిక కమిటీ సభ్యులు తెలిపారు. వసంత నవరాత్రోత్సవాల సందర్భంగా ప్రతి రోజు ఉదయం తొమ్మిది గంటలకు ఆశీర్వచన మండపములో లక్షపుష్పార్చన నిర్వహించనున్నట్లు తెలిపారు. ఈ సందర్భంగా ఉత్సవమూర్తికి రోజుకు ఒక రకము గల ఉత్తమ జాతి పూలతో అర్చన చేస్తారు.  మల్లెపువ్వులు, పచ్చ చామంతి పువ్వులు, గులాబి పువ్వులు, కనకాంబరం పువ్వులు, మరువం, తామరపువ్వులు, మారేడు దళములు, జిల్లేడుపువ్వులు, తులసి దళములు, మందార పువ్వులు, తెల్ల చామంతి, కలువ పువ్వులు, కాగడా మల్లెపువ్వులతో ప్రత్యేక పూజలు నిర్వహించనున్నట్లు వైదిక కమిటీ సభ్యులు తెలిపారు. ఈ పూజా కార్యక్రమంలో పాల్గొనాలనుకున్న భక్తులు రూ.1116 రుసుం చెల్లించి టికెట్ తీసుకోవల్సి ఉంటుందన్నారు. ఉగాది రోజు.. ఉగాది పర్వదినం సందర్భంగా11న తెల్లవారు జామున 2.30 గంటలకు స్నపనాభిషేకం. అనంతరం ఎనిమిది గంటలకు అమ్మవారి దర్శనానికి భక్తులకు అనుమతిస్తారన్నారు. ఉదయం 10 గంటలకు భవానీ దీక్షా మండపంలో పంచాంగ శ్రవణం ఉంటుందన్నారు. సాయంత్రం 5.30 గంటలకు వెండి రథోత్సవం, ప్రచార రథంతో జమ్మిదొడ్డి నుంచి ప్రారంభించి పాతబస్తీ బ్రాహ్మణవీధిలో నుంచి శ్రీనివాస మహల్ సెంటర్ వరకు, తిరిగి వన్‌టౌన్ మెయిన్ రోడ్డు, పోలీస్ స్టేషన్, కాళేశ్వరరావు మార్కెట్, వినాయక గుడి, రథం సెంటర్ మీదుగా కొండపైకి చేరుతుందన్నారు.