Posted: 12/20/2012 06:31 PM IST

ఏజెన్సీలో బాక్సైట్ తవ్వకాలను రద్దు చేస్తూ సీఎం ప్రకటించకపోవడాన్ని నిరసిస్తూ అఖిలపక్షాలు బుధవారం చేపట్టిన మన్యం బంద్‌కు మిశ్రమ స్పందన లభించింది. కొన్ని మండలాల్లో విజయవంతం కాగా, మరి కొన్ని మండలాల్లో పాక్షికంగా జరిగింది. పెదబయలు, ముంచంగిపుట్టు, జి.మాడుగుల, అరకులోయ, అనంతగిరి, డుంబ్రిగుడ, పాడేరు, జి.కె.వీధి, కొయ్యూరు మండలాల్లో దుకాణాలను కొంత మంది స్వచ్ఛందంగా మూసివేశారు. పెదబయలు, ముంచంగిపుట్టు, అరకులోయ ప్రాంతాలకు ఆర్టీసీ బస్సులను నిలిపివేశారు. పాడేరు పట్టణంలో బంద్‌కు కొంత మంది వ్యాపారులు స్పందించారు. పాడేరులో సీఎం పర్యటనను అడ్డుకుంటామని వైఎస్సార్ సీపీ, బీఎస్పీ, సీపీఐ, సీపీఎం, గిరిజన సంఘం, బీజేపీ, ఎస్‌ఎఫ్‌ఐ, ఏఐఎస్‌ఎఫ్ తదితర విద్యార్థి సంఘాలు ముందుగానే హెచ్చరించడంతో పోలీసులు అప్రమత్తమయ్యారు. సీఎం పర్యటనకు అడ్డంకి లేకుండా పోలీసులు ముందుగానే ఆయా పార్టీల నేతలను అరెస్టు చేసి పాడేరు పోలీసు స్టేషన్‌కు తరలించారు.