విశాఖ తీరం వద్ద లెహర్ తీరం దాటే అవకాశం

Posted: 11/25/2013 09:07 PM IST

అండమాన్‌లో తుఫాన్ ఏర్పడిన నేపథ్యంలో కోస్తాలోని అన్ని ప్రధాన ఓడరేవుల్లో రెండో నంబరు ప్రమాద హెచ్చరికను ఎగురవేసినట్టు విశాఖ తుపాను హెచ్చరిక కేంద్రంఅధికారి ఒకరు తెలిపారు. అన్ని పోర్టుల్లోనూ రెండో ప్రమాద హెచ్చరికలు జారీ చేశారు. బంగాళాఖాతంలో లెహర్ తుఫాను కొనసాగుతోంది. అండమన్ తీరాన్ని దాటిన లెహర్ తుఫాను కోస్తాంధ్ర వైపు కదులుతుంది.

 

ఈరోజు రాత్రికి తీవ్ర పెనుతుఫాన్‌గా మారుతుందని భారత వాతావరణ శాఖ తెలిపింది. తరువాత పశ్చిమ వాయువ్యంగా పయనిస్తుందని, ఈ క్రమంలో కోస్తావైపుగా పయనించి ఈ నెల 28వ తేదీ మధ్యాహ్నానికి కళింగపట్నం-మచిలీపట్నంల మధ్య కాకినాడ సమీపాన తీరం దాటుతుందని పేర్కొంది. మచిలీపట్నం, కళింగపట్నం, మధ్య కాకినాడ దగ్గర పెను తుఫానుగా మారి తీరం దాటుతుందని అంచనా వేశారు. మత్స్యకారులను వాతావరణశాఖ అధికారులు అప్రమత్తం చేసింది.

 

విశాఖ తీరానికి సుమారు 1200 కిలోమీటర్ల దూరంలో లెహర్ తుపాను కేంద్రీకృతమై ఉంది. అర్ధరాత్రికి పోర్టుబ్లెయిర్ వద్ద తీరాన్ని దాటి ఆగ్నేయ బంగాళాఖాతంలోకి ప్రవేశించిన అనంతరం మరింత బలపడి తీవ్ర తుపానుగా మారింది. ఇదిలావుండగా లెహర్ తుఫాన్‌పై కొంతమంది నిపుణులు ఒకింత భిన్నంగా విశ్లేషిస్తున్నారు. ఒక వాయుగుండం, తరువాత హెలెన్ తుఫాన్ సంభవించడంతో బంగాళాఖాతంలో సముద్ర ఉపరితల ఉష్ణోగ్రతలు లెహర్‌కు అంతగా అనుకూలించకపోవచ్చునని, అందువల్ల బలహీనపడే అవకాశం వుందని పేర్కొంటున్నారు. అయినా తీరం దాటే సమయంలో కోస్తాపై ప్రభావం వుంటుందని వివరించారు.