Posted: 12/28/2012 06:46 PM IST

చలికి కొండకోనలు గజగజలాడుతున్నాయి. తెరలు తెరలుగా కురుస్తున్న మంచుతో మన్యంలో పల్లెలు ముణగదీసుకుంటున్నాయి. ఎడాపెడా వీస్తున్న చలి గాలులు ప్రజలను హడలెత్తిస్తున్నాయి. మొత్తం మీద శీతాకాలం ఏజెన్సీమీద పంజా విసురుతోంది. శీతల గాలులతో నలుమూలల నుంచి దాడి చేస్తోంది. అవధుల్లేని చలి కారణంగా మన్యంలో కనిష్ట ఉష్ణోగ్రతలు నమోదవుతున్నాయి. చలి తీవ్రతతో మన్యం వాసులు తీవ్ర ఇబ్బందులు పడుతున్నారు. గురువారం లంబసింగిలో 3.5 డిగ్రీలు, మినుములూరులో 6 డిగ్రీలు, చింతపల్లిలో 7.2 డిగ్రీల కనిష్ట ఉష్ణోగ్రతలు నమోదయ్యాయి.లంబసింగిలో చింతపల్లి కన్నా తక్కువ ఉష్ణోగ్రత ఉంటుందని చింతపల్లి వ్యవసాయ పరిశోధన కేంద్రం శాస్త్రవేత్తలు చెబుతున్నారు.

లంబసింగిలో ఉష్ణోగ్రతను కొలిచే సాధనం లేదు. దీంతో కనిష్ట ఉష్ణోగ్రతలను కచ్చితంగా చెప్పలేకపోతున్నారు. లంబసింగి శీతల ప్రాంతం కావడంతో చింతపల్లి కన్నా మరో 4 డిగ్రీలు తక్కువ నమోదైనట్లు చెప్పడం పూర్వం నుంచి అనవాయితీగా ఉంటోంది. మన్యంలో మధ్యాహ్నం మూడు గంటల నుంచే చలి గాలులు వీస్తున్నాయి. సాయంత్రం ఐదు గంటల తర్వాత జన సంచారం బాగా తక్కువవుతోంది. రాత్రి 11 గంటలయ్యేసరికి మంచు దట్టంగా కురుస్తోంది. ఉదయం 10 గంటల వరకు మంచు తెరలు వీడడం లేదు. సూర్యోదయం కూడా ఆలస్యమవుతోంది. ఎండ ఎక్కే వరకు జనం ఇళ్లల్లోనుంచి రాలేకపోతున్నారు.