సీఎం సభకు మంత్రి బాలరాజు గైర్హాజరు-చంద్రబాబే కారణం

Posted: 11/15/2013 08:22 PM IST

విశాఖజిల్లాలోని రంప చోడవరంలో ఈరోజు ఏర్పాటు చేసిన సీఎం కిరణ్ రచ్చబండ కార్యక్రమానికి మంత్రి బాలరాజు హాజరు కాలేదు. రచ్చబండ కార్యక్రమానికి ఎందుకు హాజరు కాలేదని మంత్రి బాలరాజును మీడియా ప్రశ్నించగా... తనకు సీఎం రచ్చబండ కార్యక్రమం ఉందని సమాచారం అందలేదని, సీఎం తనతో చర్చించలేదని, సీఎం కార్యాలయం అధికారులతో చెప్పించే దుస్థితి ఎందుకు వచ్చిందని ఆయన అన్నారు. తాను సమైక్యవాదానికి కట్టుబడి ఉన్నానని మంత్రి పేర్కొన్నారు. ఇదే విషయంపై మంత్రి కొండ్రు మురళి స్పందించారు. సీఎం పర్యటనపై సమాచార శాఖ మంత్రి బాలరాజుకు సమాచారం అందించకపోవడం సరికాదన్నారు. సమాచారం అందించని అధికారులపై చర్యలు తీసుకుంటామని కొండ్రు మురళి చెప్పారు.

 

చంద్రబాబే కారణం

రాష్ట్ర విభజనకు తెలుగుదేశం పార్టీ అధ్యక్షడు చంద్రబాబు నాయుడే కారణమని ముఖ్యమంత్రి కిరణ్‌కుమార్‌రెడ్డి ఆరోపించారు. విభజనకు అంగీకరిస్తూ లేఖ ఇచ్చి, ఇప్పుడు సమన్యాయం అంటున్నారని, అసలు సమన్యాయం అంటే ఏమిటో బాబు చెప్పాలని సీఎం డిమాండ్ చేశారు. పశ్చిమగోదారి జిల్లా, పొన్నూరు మండలం, జగన్నాథపురంలో శుక్రవారం సాయంత్రం జరిగిన రచ్చ బండ కార్యక్రమంలో పాల్గొన్న సీఎం కిరణ్ ప్రసంగించారు. ఒక నిర్ణయం తీసుకునేటప్పుడు మేలు జరగాలి, అలా జరిగితేనే ప్రజలు హర్షిస్తారని ఆయన అన్నారు.

 

దురదృష్టవ శాత్తు రాష్ట్ర విభజనపై కేంద్రం నిర్ణయం తీసుకున్నదని, ఈ నిర్ణయాన్ని ప్రజలు వ్యతిరేకిస్తున్నారని, సమైక్యన్ని కోరుకుంటున్నారని, సిఎం కిరణ్ పేర్కొన్నారు. ఇదే విషయాన్ని ఈనెల 18వ తేదీన ఢిల్లీలో జరగనున్న సమావేశంలో వినిస్తానని ఆయన స్పష్టం చేశారు. కాంగ్రెస్ పార్టీ కంటే ముందే అన్ని రాజకీయ పార్టీలు విభజనపై లేఖలు ఇచ్చారని, వీటిని ఆధారంగా కేంద్రం విభజన నిర్ణయాన్ని తీసుకుందని ఆయన అన్నారు. సమైక్యానికి తాను గట్టిగా కృషి చేస్తానని అన్నారు.

 

ఈ సందర్భంగా ముఖ్యమంత్రి రూ. 78.60 కోట్ల అభివృద్ధి పనులకు శంకుస్థాపన చేశారు. రచ్చబండ కార్యక్రమం కోసం జిల్లాలోని పెనుగొండకు చేరుకున్న సీఎంకు ఏఎంసీ గెస్ట్ హౌస్‌లో కేంద్ర మంత్రి కావూరి, జిల్లా మంత్రలు, పలువురు నేతలు కిరణ్‌కుమార్‌రెడ్డికి స్వాగతం పలికారు.