వీరు జీవితాన్నే 'జయించారు'.

Posted: 05/17/2013 01:30 PM IST

మొన్న వార్తలు విన్న వారికి , కొంతమందికైతే ఈ వార్త ముందు షాక్ కి గురి చేసినా , తరువాత ఊరటనిచ్చింది . భాషా బేధం లేకుండా , యావత్ ప్రపంచం అభిమానించే హీరోయిన్, ఎంజలీనా జాలీ , క్యాన్సర్ తో పోరాడి గెలవటం . చాల మంది ఇంగ్లీషు వారు కాక , ఇతర భాషా అభిమానులకు ఈ వార్త ఎంతో ఆశ్చర్యానికి గురి చేసింది . స్టార్ హీరోయిన్ హోదా , తనతో సమానంగా పేరు ఉన్న హాలీవుడ్ హీరో , బ్ర్యాడ్ పిట్ తో ప్రేమ బంధం , గంపెడు పిల్లలు , అయినా ఇంకా పిల్లల్ని కనడం కొనసాగిస్తాను అంటున్న ఎంజలీన ధీమా , అన్నిటికీ మించి లెక్కలేనంత డబ్బు , పట్టలేని హోదా , ఈ క్యాన్సర్ వ్యాధి ఎంజలీన జోలికే ఎందుకు వెళ్ళాలి ? ఇటువంటి మహమ్మారి తో పోరాడి గెలిచిందంటే , ఈ హీరోయిన్ ధైర్యానికి , ఆత్మా స్థైర్యానికి జోహార్లు ...

ఈ సందర్భంగా , రీల్ లైఫ్ లో కష్టాలు ఉన్నట్టుగా సినిమాల్లో నటించడం మాట అటుంచి , రియల్ లైఫ్ లో క్యాన్సర్ వంటి మహమ్మారి తో పోరాడి గెలిచిన కొంతమంది హీరోయిన్ల ధైర్యం మాటలలో చెప్పుకుందాం ;

మహేష్ బాబు కౌ బాయ్ గెట్ అప్ లో కనిపించిన 'టక్కరి దొంగ' చూసిన ప్రతీ ఒక్కరికి , ఈ చిత్రం లో సెకెండ్ హీరోయిన్ గా నటించిన బిపాషా బాసు కన్నా , మెయిన్ హీరోయిన్ , లీసా రే అంద చందాలు విపరీతంగా నచ్చాయి . తరువాత హిందీ సినిమాల్లో కనిపించిందీ సూపర్ మాడల్ . ఆపై కొన్ని హాలీవుడ్ సినిమాల్లో కూడా నటించింది . అయితే , అనుకోకుండా క్యాన్సర్ బారిన పడింది లీసా ... దాదాపు ఒక 3 సంవత్సరాలు ఈ వ్యాధి తో పోరాడింది . తనకు తానూ సద్ది చెప్పుకుంటూ , ట్రీట్మెంట్ తీసుకుంటూ , ఈ వ్యాధి తన బాహ్య సౌందర్యం పైన ఎంతటి ఊహించలేని ప్రభావం చూపిస్తున్నా , అంతర్లీనంగా తన ఆత్మా స్థైర్యాన్ని మాత్రం వదలలేదు లీసా . ఫలితంగా క్యాన్సర్ ని తన నుండి తరిమి కొట్టి , ఒక హాలీవుడ్ ఫోటోగ్రాఫర్ ను ప్రేమించి , గత యాడాది వివాహం చేసుకుంది లీసా ...

'రాఖీ రాఖీ' అంటూ కుర్ర కారుని తన స్వరం తో కవ్వించినా , 'యమ దొంగ ' చిత్రం లో వయ్యారాలు పోతూ 'అబ్బాయా' అంటూ యన్ . టీ . ఆర్. ను బుట్టలో వేసుకున్నా , ఇది కేవలం మమతా మోహన్దాస్ కు మాత్రమె సాధ్యపడింది . తెలుగు , తమిళం , మలయాళం లో ఎన్నో చిత్రాలలో నటించి , తన గాన మాధుర్యాన్ని పంచిన ఈ తలెంటెడ్ తార కూడా , క్యాన్సర్ బారిన పడక తప్పలేదు . కరియర్ పుంజుకుంటున్న సమయం లోనే ఈ వ్యాధి వల్ల కొద్ది రోజులు బ్రేక్ తీసుకోవలసి వచ్చింది మమత . తరువాత , నమ్మకం తో , సరి అయిన ట్రీట్మెంట్ తో ఈ వ్యాధి ని జయించి , పెళ్లి కూడా చేసుకున్న మమత , ఇప్పుడు మనస్పర్ధలతో భాగస్వామి తో విడిపోయి , మళ్ళీ సినిమాల్లో సెకెండ్ ఇన్నింగ్స్ కోసం ప్రయత్నం చేస్తోంది .

90 లలో హిందీ చిత్ర సీమ లో అడుగుపెట్టి , భాసాబెధం లేకుండా సినిమాలు చేసి , అన్ని భాషలలో కుర్రకారుని ఉర్రూతలూగించిన నటి , మనీషా కొయిరాల . హీరోయిన్ గా సాధించవలసిన విజయాలు సాధించిన తరువాత , తన చిన్ననాటి స్నేహితునితో , పెద్దలు కుదిర్చిన వివాహం చేసుకున్న మనీష , సగటు మహిళగా అత్తవారింట వేధింపులు ఎడురుకోక తప్పలేదు . ఈ అక్కరలేని బంధం నుండి బయట పడ్డాను కదా అనుకుంటున్న సమయం లో క్యాన్సర్ వ్యాధి తనను చుట్టుముట్టిందని తెలుసుకున్న మనీష , ధైర్యం కోల్పోకుండా సమయానికి స్పందించి , వైద్యం , ధైర్యం రెండూ సరిగ్గా తనకు అందేలా చూసుకుని , ప్రస్తుతానికి క్యాన్సర్ ను తన జీవితం నుండే తరిమికోట్టింది .

ఇక దక్షిణాది నటి , గౌతమి వైవాహిక జీవితం లో సమస్యలని ఎదురుకోవడం , తన కూతురిని పెంచుకుంటూ , 'తోటి నటుల స్నేహం , సహకారం తో ' క్యాన్సర్ వ్యాధి నుండి ఎలా విముక్తి పొందిందో , మనందరికీ తెలిసిందే ...

'రంగుల ప్రపంచం లో అందరు సున్నిత మనస్కులు , కష్టాలు తట్టుకోలేరు ' అనుకునే ప్రతీ ఒక్కరికీ ఈ మహిళలందరి జీవితాలే ఒక స్పూర్తి .