Posted: 07/07/2012 11:32 AM IST

ఎట్టకేలకు కర్ణాటక రాజకీయ సంక్షోభానికి త్వరలో తెర పడనుంది. గత కొన్ని రోజులుగా బీజేపీ అధిష్టానానికి, కర్ణాటక ముఖ్యమంత్రి సదానంద గౌడ కు కంటిమీద కునుకు లేకుండా చేస్తున్న మాజీ ముఖ్యమంత్రి యడ్యూరప్ప ఎట్టకేలకు తను అనుకున్నది సాధించబోతుంది. సదానందగౌడను ముఖ్యమంత్రి పీఠం నుండి దించేసి, తన వర్గానికి చెందిన వారిని ముఖ్యమంత్రి పీఠం పై కూర్చోబెట్టాలనేది యడ్యూరప్ప వర్గం డిమాండ్. దీని కోసం బీజేపీ అధిష్ఠానం రాజీ ఫార్ములా సిద్ధం చేసినట్లు తెలిసింది.

ఇందులో భాగంగా మంత్రి జగదీశ్ శెట్టర్‌కు ముఖ్యమంత్రి పీఠాన్ని అప్పగించి, ఈశ్వరప్పను పార్టీ అధ్యక్షుడిగా కొనసాగించాలని అధిష్ఠానం నిర్ణయించినట్లు తెలిసింది. ప్రస్తుత పరిస్థితుల్లో సదానందగౌడ, యడ్యూరప్పలకు ఎటువంటి కీలక పదవులు కట్టబెట్టకుండా పార్టీకి, ప్రభుత్వానికి సహకరించాలని సూచించి నాయకత్వ సమస్యకు తెర దించాలని హైకమాండ్ ఆలోచిస్తున్నట్లు తెలిసింది.  త్వరలో శాసనాసభ పక్ష నేతగా జగదీష్ శెట్టర్ ని నియమించే అవకాశాలు కనిపిస్తున్నాయి.