విజయమ్మ దీక్ష భగ్నం

Posted: 08/24/2013 08:24 AM IST

రాష్ట్ర విభజన విషయంలో సమన్యాయం ఉండాలంటూ వైఎస్సార్‌ సీపీ గౌరవాధ్యక్షురాలు వైఎస్‌. విజయమ్మ చేపట్టిన ఆమరణదీక్షను పోలీసులు అర్ధరాత్రి దాటిన తర్వాత భగ్నం చేశారు. గుంటూరులోని బస్టాండ్‌ ఎదుట చేపట్టిన దీక్ష ఐదో రోజుకు చేరుకుంది. ఆమె ఆరోగ్యం బాగా క్షీణించిందని, తక్షణమే ఫ్లూయిడ్స్‌ అందించాలని, లేదంటే పరిస్థితి విషమించే ప్రమాదం ఉందని వైద్యులు నివేదిక ఇచ్చారు. ఈ క్రమంలోఅర్ధరాత్రి తర్వాత 1.30 గంటల ప్రాంతంలో పోలీసుల సమరదీక్ష వేదికపైకి చేరుకున్నారు. మొదట దీక్ష విరమించాలంటూ విజయమ్మను కోరారు. అయితే అందుకు ఆమె నిరాకరించడంతో బలవంతంగా దీక్షను భగ్నం చేశారు. అనంతరం ఆమెను పోలీసు జీపులో ఎక్కించి ప్రభుత్వ ఆసుపత్రికి తరలించారు. దీక్ష భగ్నం చేస్తారని సమాచారం అందుకున్న వైకాపా అభిమానులు, నేతలు పెద్దఎత్తున దీక్షాశిబిరం వద్దకు చేరుకున్నారు. జై జగన్‌, జై వైఎస్‌ర్‌, జై సమైక్యాంధ్ర అంటూ నినాదాలను హోరెత్తించారు. ఈ క్రమంలో పోలీసులకు, కార్యకర్తలకు మధ్య ఘర్షణ చోటుచేసుకుంది. వేదికపైకి చేరుకున్న మహిళా ర్యాపిడ్‌యాక్షన్‌ ఫోర్స్‌ను కార్యకర్తలు ప్రతిఘటించారు. దీక్షను భగ్నం చేయడానికి వీల్లేదంటూ నినదించారు. ఇదిలావుండగా విజయమ్మ దీక్ష భగ్నానికి నిరసనగా శనివారం రాష్ట్ర బంద్‌కు వైకాపా పిలుపునిచ్చింది.