అపార్టెమెంట్లలోకి చోచ్చుకోచ్చిన రేవ్ పార్టీలు

Posted: 10/26/2014 12:37 PM IST

హైదరాబాద్ నగర శివారు ప్రాంతాలు రేవ్ పార్టీలకు అడ్డాలుగా మారుతున్నాయి. పార్టీల పేరుతో అసభ్య, అశ్లీల నృత్యాలకు మన యువత చేరువవుతున్నారు. పాశ్చాత్య సంస్కృతి మోజులో పడి దేశీయ సంప్రదాయానికి కాలరాస్తున్నారు. చివరకు ఈ పైత్యం జడలు విప్పింది. జనవాసాలకు దూరంగా వుంటే ప్రాంతాల్లోని రిసార్ట్స్ లు, ఫామ్ హౌజ్ లు దాటి అసార్టుమెంట్లోకి చోచ్చుకోచ్చింది. సభ్య సమాజానికి కూడా భయపడకుండా, సమాజాన్నే బెదరగొట్టేందుకు ఈ విపరీత పరిణామాలు కారణమవుతున్నాయి. అంతేకాదు యువతను చెడు మార్గంలో పయనింపజేసేందుకు, వారిలో నేర ప్రవృత్తి పెంపోందించేందు. హింసా మార్గాన్ని ఎంచుకునేందుకు ఈ పార్టీలు కారణమవుతున్నాయి.

రంగారెడ్డి జిల్లా మేడ్చల్ లో జరిగిన రేప్ పార్టీ, పోలీసులపై పార్టీ నిర్వాహకులు తిరగబడిన వైనాన్ని మరువక ముందే.. నగర శివారులోని ఓ అపార్ట్మెంట్లో రేవ్ పార్టీని నిర్వహించారు కొందరు యువకులు. పక్క సమాచారంతో రేవ్ పార్టీపై పోలీసులు దాడి చేసి అశ్లీల నృత్యాలు చేస్తున్న తొమ్మిది మంది యువతియువకులను అదుపులోకి తీసుకున్నారు. అనంతరం వారి పోలీసు స్టేషన్కు తరలించారు. ఈ సంఘటన నగరం శివారులోని జవహర్నగర్ యాప్రాల్ రిజిస్ట్రేషన్ కాలనీలో చోటు చేసుకుంది.

కాలనీలోని ఓ అపార్ట్మెంట్లో యువతియువకులు అశ్లీల నృత్యాలు చేస్తున్నట్లు స్థానికులు పోలీసులకు సమాచారం అందించారు. దీంతో పోలీసులు ఆ అపార్ట్మెంట్పై దాడి చేసి అశ్లీల నృత్యాలు చేస్తున్న తొమ్మిది మంది యువతి యువకులను అదుపులోకి తీసుకున్నట్లు చెప్పారు. వారిలో ముగ్గురు యువతులు, ఆరుగురు యువకులు ఉన్నారని తెలిపారు. వారిపై కేసు నమోదు చేసి దర్యాప్తు చేస్తున్నట్లు పోలీసులు వెల్లడించారు.

జి.మనోహర్