మంచి మనిషి ‘పాలడుగు’ మనకు లేరు

Posted: 01/19/2015 08:04 AM IST

కాంగ్రెస్ సీనియర్ నేత పాలడుగు వెంకట్రావు ఇకలేరు. కొద్దికాలంగా అనారోగ్యంతో బాధపడుతున్న పాలడుగు, అపోలో ఆస్పత్రిలో చికిత్స పొందుతూ ఈ తెల్లవారుజామున(సోమవారం) తుదిశ్వాస విడిచారు. మధుమేహంతో పాటు, ఇతర ఆరోగ్య సమస్యలు ఉన్నాయి. కృష్ణా జిల్లా ముసనూరు మండలం గోగుల పాడుకు చెందిన పాలడుగు అంచెలంచెలుగా కాంగ్రెస్ సీనియర్ నేతగా ఎదిగారు. 1968లో యువజన కాంగ్రెస్ లో చేరిన ఈయన, నూజివీడు అసెంబ్లీ స్థానం నుంచి రెండు సార్లు ఎమ్మెల్యేగా గెలుపొందారు. నేదురుమల్లి జనార్ధన్ కేబినెట్ లో పౌరసరఫరాల శాఖ మంత్రిగా పనిచేశారు. 1972 నుంచి 1978 వరకు ఎమ్మెల్సిగా ఉన్నారు. విభజన తర్వాత ఏపి నుంచి ప్రస్తుతం ఎమ్మెల్సిగా కొనసాగుతున్నారు.

కాంగ్రెస్ లో ఉన్న కొద్దిమంది సోషలిష్టు నేతల్లో పాలడుగు వెంకట్రావు ఒకరు. స్వతహాగా పాలడుగు ధనవంతుడు, భూస్వామి అయినప్పటికీ ఆ దర్పం ప్రదర్శించకుండా సామన్య జీవితం గడిపేవాడు. ప్రజలకు సేవచేయటంలోనే అసలైన ఆనందం ఉందని ఆస్తులను పక్కనబెట్టేశాడు. సోషలిస్టు విధానాలు పాటించే పాలడుగు పిల్లలను కూడా వద్దనుకుని జీవితాన్ని ప్రజలకు అంకితం చేశారు. తన ఆస్తులు కూడా ప్రజలకే చెందేలా వ్యవహరించారు. ఇలాంటి మంచి మనిషి మరణం పట్ల కాంగ్రెస్ నేతలు విచారం వ్యక్తం చేశారు.