రామలింగరాజుకు బెయిల్.. రేపే విడుదల

Posted: 05/11/2015 07:21 PM IST

Satyam computers founder ramalinga raju his brother rama raju and eight others were granted bail

కీలక కేసుల్లో కోర్టులు నిందితులకు బెయిల్ లు మంజూరు చెయ్యడం మీడియాలో హాట్ టాపిక్ గా మారింది. మొన్న హిట్ అండ్ రన్ కేసులో సల్మాన్ ఖాన్, నిన్న అక్రమంగా ఆస్తులను కలిగి ఉన్న కేసులో జయలలిత, మరి రేపు ఎవరు అంటూ జనాలు మాట్లాడుతుండగానే సత్యం రామలింగరాజుకు కోర్టు బెయిల్ మంజూరు చేసేసింది. రామలింగరాజుకు ఊరట లభించింది. సత్యం కుంభకోణం కేసులో ఆయనకు న్యాయస్థానం బెయిల్ మంజూరు చేసింది. రామలింగరాజుతో పాటు మిగతా నిందితులకు కోర్టు బెయిల్ ఇచ్చింది. రామలింగరాజు, రామరాజు రూ.లక్ష చొప్పున, మిగతా నిందితులు రూ.50 వేలు పూచికత్తు చెల్లించాలని కోర్టు ఆదేశించింది. కాగా సత్యం కుంభకోణం కేసులో సీబీఐ ప్రత్యేక న్యాయస్థానం తనకు ఏడేళ్లు జైలు శిక్ష విధించడాన్ని సవాలు చేస్తూ ఆయన నాంపల్లి కోర్టులలో అప్పీల్ పిటిషన్ దాఖలు చేసిన విషయం తెలిసిందే.

అంతర్జాతీయంగా సంచలనం సృష్టించిన సత్యం కంప్యూటర్స్ కుంభకోణం కేసులో రామలింగరాజు, ఆయన సోదరుడు రామరాజు సహా 10 మందిని ప్రత్యేక కోర్టు దోషులుగా నిర్ధారించింది. వారందరికి ఏడేళ్ల కఠిన కారాగార శిక్ష విధించడంతోపాటు మొదటి, రెండో నిందితులుగా ఉన్న రామలింగరాజు, రామరాజుకు భారీగా, ఇతర నిందితులకు లక్షల్లో జరిమానా విధిస్తూ ప్రత్యేక కోర్టు జడ్జి బీవీఎల్‌ఎన్ చక్రవర్తి తీర్పు వెలువరించిన సంగతి తెలిసిందే. మొత్తానికి కోర్టులు ఇలా వరుసగా ఫేమస్ పర్సనాటిలీలకు అనుకూలంగా బెయిల్ లు మంజూరు చెయ్యడం నిజం అనుకోకుండా జరుగుతుందేమో కానీ ప్రజలకు మాత్రం కావాలనే జరుగుతుంది అన్న అనుమానాలకు తావిస్తోంది.

*అభినవచారి*