ప్రత్యేక హోదా మీద పార్టీల నాటకాలు

Posted: 08/11/2015 03:37 PM IST

ఏపీ స్పెషల్ స్టేటస్ పై ఎవరి డ్రామా వాళ్లే నడుపుతున్నారు. ఎవరి డప్పు వాళ్లు తెగ కొట్టుకొంటున్నారు. పార్టీలన్నీ పోటీపడి మరీ మహేశ్ దూకుడు సినిమాల్లో క్యారెక్టర్లలా యాక్షన్ ఇరగదీసేస్తున్నారు. బెస్ట్ పర్మార్మెన్స్ అవార్డ్ నాకే ఫిక్స్ అని కాంగ్రెస్ అనుకుంటుంటే.. కాదు నాకే డిసైడ్ అయిపోయిందని వైసీపీ భావిస్తోంది... వీళ్లెవరికీ కాదు... సెంట్రలో ఉంది మా ప్రభుత్వమే కనుక ప్రజ్ మనీ మోడీ మాకు ఎపుడో ఫిక్స్ చేశాడని తెలుగుదేశం భరోసాగా ఉంది. ఈ పార్టీలకు తోడు ఎర్రజెండా పార్టీలు, చిన్నా చితక సంస్థలు సైతం ప్రత్యేక హోదా ప్రైజ్ మనీ కొట్టేసేందుకు యాక్షన్ చించేస్తున్నారు.

ఏపీ ప్రత్యేక హోదా అంశంపై బీజేపీ కర్రవిరగకుండా పాము చావకుండా అన్నట్లు వ్యవహరిస్తోంది. ఎన్నికలకు ముందు సై అని... ఆ తర్వాత నై అంటోంది. ఏపీకి స్పెషల్ స్టేటస్ ప్రకటిస్తే మిగతా రాష్ట్రాల నుంచి డిమాండ్లు వెల్లువలా వచ్చే అవకాశం ఉంది. ఏపీ ప్రత్యేక హోదా విషయంలో తెలుగుదేశం బాగానే డ్రామా పండిస్తోందని చెప్పాలి. గట్టిగా పట్టుపడితే బీజేపీతో కటీఫ్ అయి మొదటికే మోసం వస్తుందనే ఆలోచనలో ఉంది. సమాధిలో ఉన్న కాంగ్రెస్ పార్టీ తిరిగి బతకాలంటే ప్రత్యేక హోదా ఒక్కటే మంత్రంలా కన్పిస్తోంది. రాష్ట్ర విభజన తర్వాత అజ్ఞాతంలోకి వెళ్లిన నాయకులు తిరిగి మళ్లీ కనీసం రోడ్లెక్కాలంటే స్పెషల్ స్టేటస్ ఒక్కటే ఇపుడు వాళ్ల మార్గం.. అందుకే రాహుల్ పర్యటన సందర్భంగా స్పెషల్ స్టేటస్ పైనే దృష్టిసారించారు.

ప్రత్యేక హోదా అంశంపై వైసీపీ ఆలస్యంగా దూకుడు పెంచింది.. ఏకంగా ఢీల్లీలోనే మకాం పెట్టి జంతర్ మంతర్ లో ప్రతాపం చూపిస్తోంది. సందు దొరికితే చాలు టీడీపీని ఇరుకున పెట్టేందుకు వ్యూహాలు సిద్ధం చేస్తోంది. హస్తిన ఆందోళనలోనూ టీడీపీనే మెయిన్ గా టార్గెట్ చేసింది. ప్రత్యేక హోదా ఇవ్వాల్సిన కేంద్ర సర్కార్ ను తమలపాకుతో కొడితే.. నిమిత్త మాత్రులమైన తమను తలుపు చెక్కతో జగన్ కొడుతున్నాడని టీడీపీ బాహాటంగానే చెబుతోంది. పార్టీలన్నీ కలిసి కట్టుగా పోరాడితే ప్రత్యేక హోదా రావడం ఖాయం.. కానీ వీళ్లు కలవరు.