అధికారపక్షమే భారతమాతను వెన్నుపోటు పోడిచింది: కేజ్రీ అరోపణల

Posted: 04/05/2016 08:46 PM IST

దేశంలో ఉగ్రవాద దాడులు జరిగేందుకు తమ సహాయ సహకారాలను అందజేసిన పాకిస్థాన్ ఇంటెలిజెన్స్ సంస్థ (ఐఎస్ఐ) నేతృత్వంలోని పాకిస్థాన్ జాయింట్ ఇన్వెస్టిగేషన్ టీమ్(జిట్)ను బృందాన్ని దేశంలోని అడుగుపెట్టనీయకూడదంటూ ఆది నుంచి వ్యతిరేకిస్తున్న ఆమ్ ఆద్మీ పార్టీ అధినేత, ఢిల్లీ ముఖ్యమంత్రి కేంద్రంలోని అధికార నరేంద్రమోడీ ప్రభుత్వంపై తీవ్ర ఆరోపణలు చేశారు. పఠాన్ కోట్ ఎయిర్ బేస్ పై ఉగ్రదాడి దర్యాప్తు చేపట్టిన జిట్ ను యావత్ ఎఫిసోడ్ అంతా భారత్ అడించిన నాటకమని చెప్పడంపై ఆయన తన స్వరాన్ని తీవ్రతరం చేశారు.

పఠాన్ కోట్ విషయంలో మోదీ సర్కార్ తీరును అరవింద్ కేజ్రీవాల్ తూర్పారబట్టారు. బీజేపీ, ఆర్ఎస్ఎస్ లు కలిసి భారతమాతకు వెన్నుపోటు పొడిచారంటూ తీవ్రస్థాయిలో ధ్వజమెత్తారు. ఇది యావత్ దేశానికే సిగ్గుచేటని భారతమాతకు ఎనలేని అవమానం జరిగిందని అన్నారు. ప్రధాని మోదీ పాకిస్థాన్ ముందు దేశాన్ని అవమానపర్చారని ఆయన మండిపడ్డారు. ఇంతకు ముందున్న దేశ ప్రధానులు ఎవరూ చేయలేనంత అవమానం భారతమాతకు నరేంద్రమోడీ చేశారని ఆగ్రహం వ్యక్తం చేశారు.

బీజేపీ, ఆర్ఎస్ఎస్ నేతలు ఓ వైపు భారత్ మాతాకీ జై కొట్టాలని నినదిస్తుండగా, మరోవైపు ఆదే పార్టీకి చెందిన అగ్రనేతలే భారత మాతకు వెన్నుపోటు పొడుస్తున్నారంటూ తన ట్విట్టర్ ద్వారా ఆగ్రహం వ్యక్తం చేశారు కేజ్రీవాల్. జిట్ నివేదిక బయటకు రాకముందే అందులో ఏముందో పాకిస్థాన్ మీడియా వెల్లడించడం, పఠాన్ కోట్ దాడికి పాల్పడింది పాక్ కాదు ఇండియానే అనే ప్రేలాపనలు పేలడం లాంటి పరిణామాలపై కూడా ఆయన ధ్వజమెత్తారు, ఈ ఘటనలన్ని మోదీ అసమర్థత వల్ల కలిగినవేనని విమర్శించారు.

మనోహర్