ITEMVIDEOS: విషనాగులతో విన్యాసం.. పాప్ సింగర్ విషాదాంతం

Posted: 04/07/2016 03:32 PM IST

Indonesian singer dies after being bitten by a cobra while performing

విషనాగులతో విన్యాసం చేయడం ఇండోనేషియాకు చెందిన 29 ఏళ్ల పాప్ సింగర్ ఇమ్రా బులె అలవాటు, వేదిక మీద శ్రావ్యంగా పాటలు పాడటంతో పాటు మధ్యమధ్యలో విషనాగులతో విన్యాసాలు చేయడం ఆమెకు సాధారణ విషయం. అయితే పాములతో ఆడేవాడు పాముకాటుకే బలవుతాడన్న నగ్నసత్యం అమెకు తెలియదనుకుంటా. అందుకనే అమె కూడా చివరకు విషనాగుల కాటుతోనే విషాదాంతం చెందింది, తాజాగా వేదిక మీద పాటపాడుతూ.. కాలనాగు తోకను తొక్కడంతో అది బుసకొట్టింది. ఆ గాయని తొడపై కాటేసింది. అయినా తన ప్రదర్శన ఆపని ఆ పాప్‌సింగర్ 45 నిమిషాలపాటు ఏకధాటిగా ప్రదర్శన ఇచ్చి.. ఆ తర్వాత కుప్పకూలింది. హుటాహుటిన అమెను అస్పత్రికి తీసుకువెళ్లినా అక్కడకు చేరుకునే లోపే అమె తుదిశ్వాస విడించిందని వైద్యులు తెలిపారు.

వెస్ట్‌ జావాలోని కారవాంగ్ గ్రామంలో ఆమె ఇటీవల ప్రదర్శన ఇస్తుండగా ఈ దారుణం జరిగింది. వేదిక మీద పాటలు పాడుతూ మధ్యమధ్య పాములతో విన్యాసాలు చేయడం ఇమ్రా ప్రత్యేకత. ఆమె షోలో విషపూరితమైన నాగుపాములు, కొండచిలువలను ఉపయోగించి విన్యాసాలు చేసేవారు. కానీ గత ప్రదర్శనలో ఆమెను విషపూరితమైన 'రియాంటీ' అనే పాము కాటేసింది. ఆమె తొడపై కాటు వేసి విషాన్ని రక్తంలోకి ఎక్కించింది. పాములను ఆడించే వ్యక్తి వెంటనే దానిని వెనక్కి లాగినా ఫలితం లేకపోయింది.

పాము కాటేసిన తర్వాత కూడా తన గానంతో 45 నిమిషాలపాటు ప్రేక్షకులను అలరించిన ఆమె.. ఆ తర్వాత వాంతులు చేసుకుంటూ వేదిక మీద కుప్పకూలింది. ఆమె చనిపోయినట్టు స్థానిక వైద్యులు నిర్ధారించారు. 'వేదిక మీద తన రెండో పాట పాడుతున్నప్పుడు ఇమ్రా పాము తోకను తొక్కింది. దీంతో అది ఆమె తొడపై కాటేసింది' అని ఈ ప్రదర్శనలో ప్రేక్షకుడైన ఫెర్లాండో స్థానిక వెబ్‌సైట్‌కు తెలిపారు. పోలీసులు ఈ ఘటనపై విచారణ జరుపుతున్నారు.

మనోహర్