అమ్మవారి అలంకరణకు.. కరెన్సీనోట్లు, బంగారం, వజ్రాలు, రత్నాలు..!

Posted: 04/15/2016 05:01 PM IST

తమిళ నూతన సంవత్సరాన్ని పురస్కరించుకుని (ఉగాదిని పురస్కరించుకుని) కోయంబత్తూరులో అంబికా ముత్తుమరియమ్మ అమ్మవారు మునుపెన్నడూ లేని విధంగా భక్తులకు అభయాన్ని ఇస్తున్నారు, నూతన వంవత్సరాన్ని పురస్కరించుకుని అమ్మవారి వినూత్నంగా అలంకరించారు. కరన్సీనోట్లు, బంగారం, వజ్రాలతో అలంకరించి, అమ్మవారికి కొత్త శోభ తెచ్చారు. ఇందుకోసం రూ. ఐదు కోట్ల నగదు, కేజిన్నర బంగారం వినియోగించారు. తమిళ నూతన సంవత్సరం మొదటి రోజు ఉగాది పండగను అక్కడి ప్రజలు ఘనంగా జరుపుకుంటారు. ఈ ఉత్సవాలతో పలు ఆలయాలు కొత్త శోభను సంతరించుకున్నాయి.

కోయంబత్తూరులోని అంబికాముత్తుమరియమ్మ ఆలయంలో కూడా ఏటా ఉగాది వేడుకలు కన్నుల పండువగా జరుగుతాయని భక్తులు చెబుతున్నారు. అయితే ఇక్కడ ప్రతిఏటా అమ్మవారికి నగదు, బంగారంతో అలంకరించడం ఆనవాయితీగా వస్తోంది. పక్షం రోజుల పాటు అమ్మవారికి ప్రత్యేక పూజలు నిర్వహించిన తరువాత కరెన్సీ నోట్లను భక్తులకు పంచుతారని, వీటిని తమ ఇళ్లలో, కార్యాలయాల్లో పెట్టుకుంటే తమ వ్యాపారాలు వృద్ది చెందుతాయని, ఇళ్లలో కూడా ఆదాయానికి లోటు లేకుండా వుంటుందని భక్తలు విశ్వాసం.

కాగా తాజాగా ఈ ఏడాది అమ్మవారి విగ్రహానికి బంగారు తాపడం చేయించారు. అభయ హస్తం ఇస్తున్న అమ్మవారికి బంగారు తాపడం చేయించడంతో విగ్రహానికి కొత్త కళ వచ్చింది. వెయ్యి రూపాయల నోట్లతో ఆలయాన్ని అలంకరించారు. ఆలయంలో ఎటు చూసినా డబ్బే డబ్బు. ఆలయ ముఖద్వారం నుంచి అంతర్భాగం మొత్తం నోట్లతో అలంకరించారు. అమ్మవారి విగ్రహం ముందు బంగారు నాణాలు, రత్నాలు, వజ్రాలు కుప్పలుగా పోశారు. అంబికా అమ్మవారిని చూసేందుకు భక్తులు భారీ సంఖ్యలో వస్తున్నారు. 

మనోహర్