మైనర్ తో పెళ్లి... పదేళ్లు అత్యాచారం

Posted: 06/03/2016 05:30 PM IST

School official rapes minor for ten years

ప్రేమించిందన్న ఒకే కారణంతో రెండో పెళ్లివాడని కూడా చూడకుండా పిల్లనిచ్చినందుకు ఆ తల్లిదండ్రులు కుమిలిపోతున్నారు. పదేళ్లుగా ఆమెపై జరుగుతున్న అఘాయిత్యాన్ని వారు ఆలస్యంగా పసిగట్టారు. కేవలం లైంగిక వాంఛ కోసమే వాడుకున్నాడని తెలిసి న్యాయస్థానాన్ని ఆశ్రయించారు. నేరాన్ని తీవ్రంగా పరిగణించిన కోర్టు అతగాడి దుర్భుధ్దికి సరైన శిక్ష విధించింది. యావజ్జీవ శిక్షతో పాటు అతని ఆస్తులను అమ్మి మరీ ఆ అమ్మాయికి నష్టపరిహారం చెల్లించాలని ఆదేశించింది.

బీదర్ జిల్లా ఔరద్ లోని ప్రభుత్వ ప్రైమరీ స్కూల్కు ఎస్డీఎమ్సీ చైర్మన్గా మారుతి ఆమ్రెప్ప (34) అనే వ్యక్తి విధులు నిర్వహించేవాడు. అదే పాఠశాలలో 8వ తరగతి చదువుతున్న ఓ బాలికపై ప్రేమగాలం వేశాడు. పెళ్లయి ఇద్దరు పిల్లలున్నా, ఈ విషయాన్ని దాచిపెట్టి మరీ పెళ్లి చేసుకుంటానని బాలిక కుటుంబ సభ్యులకు బంపరాఫర్ ఇచ్చాడు, ససేమిరా అన్న ఆమె తల్లిదండ్రులు బాలికను మంగళూరుకి తరలించి అక్కడ చదివించసాగారు. అయినా మారుతి వదల్లేదు. అక్కడే ఓ ఇల్లు అద్దెకు తీసుకుని మరీ ఆమెను రహస్యంగా పెళ్లి చేసుకున్నాడు. బాలిక కూడా అతన్ని గాఢంగా ప్రేమిస్తుండటంతో తల్లిదండ్రులు అడ్డుచెప్పలేకపోయారు.

ఇక అసలు సమస్య ఆ తర్వాతే మొదలైంది. గర్భవతైన ప్రతిసారీ ఆమెకు అబార్షన్ చేయించడం ప్రారంభించాడు మారుతి. ఇలా తొమ్మిదిసార్లు చేయించగా, పదోసారి మాత్రం ఆమె బిడ్డకు జన్మనిచ్చింది. కానీ, ఆ బిడ్డను అనాథశరణాలయంలో పడేసి వచ్చాడు ఆ కర్కోటకుడు. ఆ తర్వాత మరోసారి కూడా ఆమె గర్భవతికాగా, ఈసారి అబార్షన్ కు ఆమె ఒప్పుకోలేదు. దీంతో ఇంట్లోంచి గెంటేశాడు. తల్లిదండ్రుల వద్దకు చేరి అసలు విషయం వారికి చెప్పగా, కూతురికి జరిగిన అన్యాయం విన్న వారు అతనిపై కేసు దాఖలు చేశారు. మాయ మాటలు చెప్పి, ప్రేమ పేరుతో మైనర్ పై పదేళ్లపాటు లైంగికదాడి పాల్పడ్డాడంటూ శిక్ష విధించింది.

భాస్కర్