టీఎస్ ఎంసెట్-3 ఫలితాలు విడుదల

Posted: 09/15/2016 12:45 PM IST

తెలంగాణ ఎంసెట్-3 ఫలితాలు విడుదలయ్యాయి. ఎంబీబీఎస్‌, బీడీఎస్‌ కోర్సుల్లో ప్రవేశాల కోసం నిర్వహించిన పరీక్ష ఫలితాలు గురువారం మధ్యాహ్నం జేఎన్‌టీయూలో విడుదల చేశారు. ప్రశ్నా పత్రంలో సిలబస్ లో లేని ఓ ప్రశ్నతోపాటు మొత్తం 8 క్వశ్చన్స్ తప్పుగా వచ్చాయి. దీంతో అందరికీ 8 మార్కులు కలుపుతున్నట్లు ఉన్నతవిద్యామండలి చైర్మన్ పాపిరెడ్డి తెలిపారు.

ఫస్ట ర్యాంక్ కృష్ణా జిల్లా గుడివాడ చెందిన రేగళ్ల మానస (152), రెండో ర్యాంక్ సికింద్రాబాద్ కు చెందిన హారిక(151), మూడో ర్యాంక్ అనంతపురంకు చెందిన తేజస్విని(151) కైవసం చేసుకున్నారు. ఎంసెట్‌-2 ప్రశ్నపత్రం లీక్‌ నేపథ్యంలో ఆ పరీక్షను రద్దుచేసి సెప్టెంబరు 11న ఎంసెట్‌-3 నిర్వహించిన విషయం తెలిసిందే! ఈ పరీక్షకు 56,153 మంది విద్యార్థులకు గానూ 37,199 మంది హాజరయ్యారు. ఈ ప్రశ్నపత్రంపై విద్యార్థులు, తల్లిదండ్రుల నుంచి బుధవారం సాయంత్రం వరకు అభ్యంతరాలను స్వీకరించారు. ఫలితాల కోసం http://www.tseamcet.in/ వెబ్ సైట్ ను సంప్రదించాల్సిందిగా కన్వీనర్ యాదయ్య సూచించారు.

మరోవైపు ఎంసెట్‌-1 ద్వారా పలు కోర్సుల్లో ప్రవేశాలు పొంది.. ఎంసెట్‌-3 కౌన్సెలింగ్‌కు హాజరు కావాలనుకుంటున్న విద్యార్థులకు ఒరిజినల్‌ సర్టిఫికెట్లను ఇవ్వాలని యూనివర్సిటీలు, అనుబంధ కాలేజీలను ఉన్నత విద్యామండలి ఆదేశించింది. ఈమేరకు మండలి కార్యదర్శి శ్రీనివాసరావు వర్సిటీలకు లేఖ రాశారు. ఎంసెట్‌-2 ప్రశ్నపత్రం లీక్‌ అయిన నేపథ్యంలో విద్యా సంవత్సరం వృథా అవుతుందేమోన న్న ఆందోళనతో చాలామంది విద్యార్థులు బీఫార్మసీ, ఫార్మడీ, అగ్రికల్చర్‌, వెటర్నరీతోపాటు ఇతర కోర్సు ల్లో చేరారు. అయితే ఎంబీబీఎస్‌, బీడీఎస్‌ కోర్సుల్లో ప్రవేశాలకోసం నిర్వహించిన ఎంసెట్‌-3కి కూడా వారు హాజరయ్యారు. ఉత్తమ ర్యాంకు సాధించే అవకాశం ఉన్న విద్యార్థులు ఎంతోమంది ఉన్నారు. వీరికి ఆయా కాలేజీలు ఒరిజినల్‌ సర్టిఫికెట్లు ఇచ్చేందుకు ససేమిరా అంటున్నాయి. ఈ నేపథ్యంలో విద్యార్థులకు ఇబ్బంది కలుగకుండా ఉండేందు కు ఉన్నత విద్యామండలి చర్యలు తీసుకుంది.