ITEMVIDEOS:పవన్ డెడ్ లైన్ పై ఇదీ రియాక్షన్

Posted: 01/05/2017 04:20 PM IST

రాష్ట్రంలో ఏ నేతకు కూడా సాధ్యం కానీ రీతిలో క్లిష్టమైన ప్రజా సమస్యలను వెలుగులోకి తెస్తూ ప్రజల్లోకి చొచ్చుకుపోతున్నాడు నటుడు, జనసేన అధినేత పవన్ కళ్యాణ్. ఉద్ధానం కీడ్ని బాధితుల లాంటి తీవ్రతరమైన సమస్యపై పోరాటంను భుజస్కందాలపై వేసుకోవటమే కాదు, ప్రభుత్వానికి అల్టిమేటం కూడా జారీ చేసిన విషయం తెలిసిందే. అయితే గడువు ముగుస్తున్నా ప్రభుత్వం నుంచి స్పందన లేదన్న వాదనకు తెరదించుతూ ఆరోగ్యశాఖామంత్రి కామినేని శ్రీనివాస్ స్పందించారు.

పవన్ డిమాండ్ చేసినట్లు ఉద్ధానం కిడ్నీ సమస్య 48గంటల్లో తీరేది కాదని ఆయన అంటున్నారు. గురువారం శ్రీకాకుళం రిమ్స్ ఆస్పత్రిలో సమీక్షా సమావేశం నిర్వహించిన ఆయన ఈ సందర్భంగా పవన్ డెడ్ లైన్ పై స్పందించాడు. ఉద్ధానం కిడ్నీ సమస్య వైద్యులకు కూడా అంతుచిక్కడం లేదన్న ఆయన కిడ్నీ బాధితులకు న్యాయం చేసే బాధ్యత మాత్రం ప్రభుత్వానిదేనని ప్రకటించారు. ఏది ఏమైనా కిడ్నీ వ్యాధిని నిర్మూలించేందుకు ప్రభుత్వం చిత్తశుద్ధితో పని చేస్తుందన్న ఆయన, బాధిత ప్రజలకు ప్రభుత్వం అండగా ఉంటుందని తెలిపారు.

 

అదే సమయంలో అనుకున్నంత సులువుగా సమస్యకు పరిష్కారం లభించదని, అందుకోసం దీర్ఘకాలికంగా ప్రయత్నాలు కొనసాగాల్సిన అవసరం ఉందన్న అభిప్రాయం ఆయన వ్యక్తం చేశారు. కాగా, గతంలో ‘కిడ్నీ రోగుల కోసం డయాలసిస్‌ సెంటర్లు ఏర్పాటుచేశాం’ అంటూ ఆరోగ్యశాఖ మంత్రి కామినేని శ్రీనివాసరావు గతంలో చేసిన వ్యాఖ్యలపై పవన్‌ తీవ్రస్థాయిలో మండిపడిన విషయం తెలిసిందే. సమస్యపై 48 గంటల్లో ప్రభుత్వం గనుక సమాధానం ఇవ్వకపోతే, తమ కమిటీ 15 రోజుల్లో సమర్పించే నివేదికతో సీఎంను కలిసి ఆపై తానే ముందుండి ఉద్యమం నడిపిస్తానని పవన్ హెచ్చరించాడు కూడా. ఇక ఇప్పుడు కిడ్నీ సమస్యలు వైద్యులకు కూడా అంతుబట్టడం లేదన్న వ్యాఖ్యలపై ఏ రేంజ్ లో రియాక్ట్ అవుతాడో చూడాలి.