వన్నె తగ్గడమే కాదు.. పసిడి దిగుమతులు దిగజారుతున్నాయ్

Posted: 08/18/2020 01:39 AM IST

India s gold imports decline 81 in april july to 2 47 billion silver imports down 56 5

(Image source from: m.economictimes.com)

దేశంలో పసిడి దిగుమతులు గతంలో ఎన్నడూ లేనంతగా పడిపోయాయి. పెళ్లిళ్ల సీజన్ లో అంతకంతకూ పెకి ఎగబాకిన పసిడి శ్రావణ మాసం పూర్తి కాకుండానే వన్నె తగ్గింది. ఇటు కొనుగోళ్లదారులు లేకపోవడంతో బంగారాన్ని దిగుమతి చేసుకునే విషయంలోనూ వ్యాపారులు నిరాసక్తిని కనబరుస్తున్నారు, బంగారం, వెండి ధరలకు రెక్కలు రావడంతో ఒకవైపు అమ్మకాలు పడిపోగా, మరోవైపు, దిగుమతులు కూడా దారుణంగా పడిపోయాయి. గతేడాది ఏప్రిల్-జులై మధ్య కాలం నాటి దిగుమతులతో పోలిస్తే ఈ ఏడాది ఏకంగా 81.22 శాతం తగ్గి 247 కోట్ల డాలర్ల (దాదాపు రూ. 18,590 కోట్లు)కు పడిపోయాయి. వెండి దిగుమతులదీ అదే పరిస్థితి.

గత నాలుగు నెలల్లో 56.5 శాతం తగ్గి 68.53 కోట్ల డాలర్ల ( దాదాపు 5,185 కోట్లు)కు క్షీణించాయి. ఫలితంగా వాణిజ్య లోటు అదుపులోకి వచ్చింది. గతేడాది ఇదే కాలంతో పోలిస్తే 5,940 కోట్ల డాలర్ల నుంచి 1,395 కోట్ల డాలర్లకు తగ్గింది. నిజానికి మార్చి నుంచే పసిడి దిగుమతులు తగ్గుతూ వస్తున్నాయి. గతేడాదితో పోలిస్తే ఈసారి మార్చిలో బంగారం దిగుమతులు 62.6 శాతం, ఏప్రిల్‌లో 99.93 శాతం, మేలో 98.4 శాతం, జూన్‌లో 77.5 శాతం తగ్గాయి. జులైలో మాత్రం స్వల్పంగా పుంజుకుని 4.17 శాతం పెరిగాయి. మరోవైపు, బంగారం, వెండి ధరలు అమాంతం పెరగడంతో అమ్మకాలు కూడా పడిపోయాయి.

గతేడాది ఏప్రిల్-జులై మధ్యతో పోలిస్తే ఈ ఏడాది అదే కాలంలో భారత్‌ నుంచి ఆభరణాల ఎగుమతులు 66.36 శాతం తగ్గి 417 కోట్ల డాలర్లకు పడిపోయాయి. కాగా బంగారాన్ని ఎక్కువగా దిగుమతి చేసుకునే దేశాల్లో భారత్ కూడా ఒకటి. భారత్ వార్షికంగా 800-900 టన్నుల బంగారాన్ని దిగుమతి చేసుకుంటోంది. ఇకపోతే హైదరాబాద్ మార్కెట్లో బంగారం ధర మళ్లీ తగ్గింది. సోమవారం 10 గ్రాముల 24 క్యారెట్ల బంగారం ధర రూ.110 పడిపోయింది. దీంతో ధర రూ.55,650కు తగ్గింది. అదేసమయంలో 22 క్యారెట్ల బంగారం ధర కూడా దిగొచ్చింది. 10 గ్రాముల బంగారం ధర రూ.110 తగ్గుదలతో రూ.51,000కు క్షీణించింది.