ఏపీ సర్కారుకు ఎదురుదెబ్బ.. ‘పంచాయితీ’ ఎన్నికలకు హైకోర్టు గ్రీన్ సిగ్నల్

Posted: 01/21/2021 02:13 PM IST

Panchayat poll schedule ap high court issues green signal on panchayat elections

ఆంధ్రప్రదేశ్ లో గ్రామపంచాయితీ ఎన్నికల నిర్వహణ విషయంలో రాష్ట్ర ప్రభుత్వానికి రాష్ట్రోన్నత న్యాయస్థానం హైకోర్టులో ఎదురుదెబ్బ తగిలింది. రాష్ట్ర ప్రభుత్వం వాదనలతో ఏకీభవించని న్యాయస్థాన ధర్మాసనం రాష్ట్ర ఎన్నికల సంఘం వాదనలను బలపరుస్తూ రాష్ట్రంలో ఎన్నికలు నిర్వహించాలని అదేశాలను వెలువరించింది. ఫిబ్రవరిలో నాలుగు దశల్లో పంచాయతీ ఎన్నికల నిర్వహణ రాష్ట్ర ఎన్నికల కమీషన్ నగరా మ్రోగించిన తరుణంలో హైకోర్టు సింగిల్ జడ్జీ ఇచ్చిన తీర్పును డివిజన్ బెంచ్ కొట్టివేసింది. షెడ్యూల్డు విడుదలైన నాటి నుంచి పలు మలుపులు తిరుగుతూ వచ్చిన ఎన్నికల పంచాయితీకి హైకోర్టు డివిజన్ బెంచ్ గ్రీన్ సిగ్నల్ ఇచ్చింది.

ప్రజల ఆరోగ్యంతో పాటు ప్రజాస్వామ్యం పరిరక్షణ కూడా ముఖ్యమన్న న్యాయస్థానం పంచాయతీ ఎన్నికల నిర్వ‌హ‌ణ అంశ‌ాన్ని కూడా ముఖ్యమైనదిగానే పేర్కొంది. క‌రోనా నేప‌థ్యంలో ఎవరికీ ఇబ్బంది లేకుండా ఎన్నికలు నిర్వహించాలని.. అందుకు అనుగూణంగా మార్గదర్శకాలను కూడా విడుదల చేయాలని పేర్కొంది. రాష్ట్ర‌ ఎన్నికల సంఘంతో ప్రభుత్వం సమన్వయం చేసుకుని ఎన్నికల నిర్వహణ సజావుగా సాగేలా చర్యలు చేపట్టాలని ఆదేశించింది. కాగా, విచార‌ణ సంద‌ర్భంగా కేంద్ర, రాష్ట్ర ప్రభుత్వాలతో పాటు ఎన్నికల కమిషన్ న్యాయ‌వాదులు ఇటీవ‌ల‌ వాదనలు వినిపించారు. దీని‌పై హైకోర్టు ప్రధాన న్యాయమూర్తి జస్టిస్‌ ఏకే గోస్వామి, జస్టిస్‌ సి. ప్రవీణ్ కుమార్ తో కూడిన ధర్మాసనం రెండు రోజుల క్రిత‌మే విచారణను ముగించి, ఇవాళ తీర్పును వెలువరించింది.

దీంతో ముందుగా నిర్ణ‌యించిన షెడ్యూలు ప్ర‌కార‌మే ఫిబ్ర‌వ‌రి 5, 9, 13, 17 తేదీల్లో ఎన్నిక‌లు జ‌రుగుతాయ‌ని రాష్ట్ర ఎన్నిక‌ల సంఘం ప్ర‌క‌ట‌న చేసింది. ఇక పంచాయతీ ఎన్నికల నోటిఫికేషన్ ఈ నెల 23న వెలువరించనున్నట్లు కూడా తెలిపింది, అయితే రాష్ట్ర ప్రభుత్వం మాత్రం కరోనా నేపథ్యంలో ఎన్నికల నిర్వహణ కష్ట సాధ్యమని, కరోనా వాక్సీనేషన్ డ్రైవ్ కొనసాగుతున్న సమయంలో ఆఘమేఘాల మీద ఎన్నికల నిర్వహించాల్సిన అవసరం లేదని సర్కార్ అభిప్రాయపడుతోంది. కాగా, హైకోర్టు డివిజన్ బెంచ్ ఇచ్చిన తీర్పుపై రాష్ట్ర ప్రభుత్వం, ఉద్యోగ సంఘాలు కూడా దేశ సర్వోన్నత న్యాయస్థానం సుప్రీంకోర్టును ఆశ్రయించనున్నాయి.