Posted: 08/17/2012 06:10 PM IST

ఆయన ప్రతిపక్ష నాయకుడు కాదు.. అధికారం ఇస్తే అన్నీచేస్తానని చెప్పాల్సిన అవసరం లేదు. పాత పాపాలకు లెంపలు వేసుకుంటూ కొత్త వరాలు కురిపిస్తూ సాగే ఎన్నికల హడావుడి మొదలవ్వడానికి మరో మూడేళ్ల సమయం ఉంది. అయినా, ఆయన ప్రతిన తీసుకున్నారు. గ్రామాలన్నింటినీ విద్యుత్ కాంతులతో నింపలేకపోతే ఓటు అడగబోనని సంకల్పం పూనారు.రాష్ట్రం నుంచి అవినీతిని తరిమికొడతానని ప్రకటించి..ఆ ప్రయత్నంలో అనేక విప్లవాత్మక చర్యలకు ఆద్యునిగా నిలిచిన బీహార్ సీఎం నితీశ్‌కుమార్ 'వెలుగు' బాట పట్టిన తీరిది. చీకట్లో మగ్గుతున్న బీహారీలకే కాదు, విలువలు లేని రాజకీయాలతో విసుగు చెందుతున్న ప్రతివారికీ ఆశ రేపే ప్రకటనను బుధవారం స్వాతంత్ర వేడుకల వేదికగా చేశారు.

"విద్యుత్ సమస్యపై ప్రస్తుతం మా ప్రభుత్వం తీవ్రంగా దృష్టి సారించింది. ప్రతి గ్రామానికి వెలుగులు అనే లక్ష్యాన్ని మరికొన్ని ఏళ్లలో చేరుకుంటాం.లేనిపక్షంలో వచ్చే ఎన్నికల్లో ఓటు ఆడిగేది లేదు'' అని స్పష్టం చేశారు. మాటలే కాదు.. రాబోయే కాలంలో చేతలు ఎలా ఉండబోయేది ఆయన వివరించారు. "నేషనల్ థర్మల్ పవర్ కార్పొరేషన్ పాట్నా సమీపంలోని బర్ జిల్లాలో నెలకొల్పుతున్న ప్లాంట్‌లో సముచిత వాటాను డిమాండ్ చేస్తున్నాం.

అలాగే ప్రైవేట్ ప్లాంట్ల ఏర్పాటుకు వీలుగా అన్ని అవరోధాలను తొలిగించాం'' అని వివరించారు. కాగా, గుజరాత్ సీఎం నరేంద్రమోడీ విషయంలో బీజేపీకి తాను అల్టిమేటం ఇచ్చినట్టు వచ్చిన వార్తలను బీహార్ సీఎం నితీశ్‌కుమార్ ఖండించారు. " మోడీని ప్రధానిని చేస్తే బీజేపీతో తెగదెంపులు చేసుకుంటామ''ని తాను ఎక్కడా అనలేదని స్పష్టం చేశారు.