Posted: 02/20/2013 11:40 AM IST

మూలిగే నక్క మీద తాటి కాయ పడ్డట్టు, ఒకదానిలోంచి తేరుకునే లోపులోనే కింగ్ ఫిషర్ కి మరో షాక్ తగుల్తోంది.  బ్యాంకుల నుంచి తీసుకున్న ఋణాలను వెంటనే తిరిగి జమకట్టకపోతే ఆస్తులను జప్తు చేస్తామంటూ బ్యాంకుల కన్సోర్టియమ్ వారం రోజుల క్రితమే నోటీసులిస్తే, ఎయిర్ లైన్స్ అధినేత విజయ మాల్యా మాత్రం ఉద్యోగులకు ఒక నెల జీతాన్ని విడుదల చేసి ఆశ్చర్యచకితులను చేసారు.  ఉద్యోగులకు వారి జీతాలను చెల్లించాం కనుక మా లైసెన్సని పునరుద్ధరించాలని సివిల్ ఏవియేషన్స్ డైరెక్టర్ జనరల్ ని కోరటం కూడా జరిగింది.  అయితే మళ్ళీ కింగ్ ఫిషర్ ఎయిర్ లైన్స్ పుంజుకుంటోందని తెలియగానే ఎయిర్ పోర్ట్స్ అధారిటీ వారు ఎయిర్ లైన్స్ బాకీ 390 కోట్ల రూపాయలను చెల్లించవలసిందిగా నోటీసు ఇచ్చి మరో షాక్ ఇచ్చింది. 

అంతకు ముందు వాయిదాల్లో చెల్లించే దిశగా కింగ్ ఫిషర్ ఇచ్చిన 117 కోట్ల రూపాయల చెక్ బౌన్స్ అవటంతో దానిమీద చట్టపరమైన చర్యలు తీసుకుంటున్నామని కూడా ఇండియన్ ఎయిర్ పోర్ట్స అధారిటీ ఛైర్మన్ వి.పి.అగర్వాల్ తెలియజేసారు.  విమానాలను జప్తు చెయ్యటానికి అవసరమైన చర్యలు కూడా తీసుకుంటామన్నారాయన.  అయితే ఇప్పటికే బాకీపడ్డందుకు కొన్ని ప్రభుత్వ శాఖలు, విమానాశ్రయ ఆపరేటర్లు కొంత వరకూ జప్తు చేసారు. 

-శ్రీజ