నటి జయప్రద నిన్న తన జన్మదినాన్ని తిరుమలేశుని సమక్షంలో గడిపారు

Posted: 04/03/2013 03:20 PM IST

అలనాటి మేటి నటి జయప్రద నిన్న తన జన్మదినాన్ని తిరుమలేశుని సమక్షంలో గడిపారు. తెలుగులోనూ, హిందీలోనూ నటిగా పేరు తెచ్చుకుని, రాజకీయాల్లోనూ అడుగుపెట్టిన జయప్రద కొన్నాళ్ళుగా తెలుగు నేలమీద రెండిటికీ దూరంగా ఉన్నారు. రాజ్యసభ సభ్యురాలిగా సేవ చేస్తున్న జయప్రద నిన్న తిరుపతిలో, తెలుగు రాజకీయాల్లోకి మరోసారి రావాలనుందన్న తన కోరికను వెలిబుచ్చారు. పదేళ్ళ తర్వాత తెలుగు రాజకీయ రంగంలో అడుగుపెడుతున్న తను మరో ఐదేళ్ళు తెలుగువారికి సేవ చెయ్యాలనుందని అన్నారు. దేవుడు వరాలివ్వటానికి తయారైతే, ఒకావిడ తనకోసం ఏమీ అడగలేదట. మా అత్తగారు బంగారపు ఉయ్యాలలో తన మనవడిని ఊపుతూ హాయిగా జీవించేట్టుగా వరమివ్వండి స్వామీ అని అడిగిందట. కానీ ఆ నిస్వార్ధపు కోరిక వెనక తన కొడుకు బంగారపు ఉయ్యాలలో ఊగటమంటే అది తన ఆస్తే కదా, అలాగే అత్తగారు ఊపుతుండాలంటే ఆమెకు అంత ఆరోగ్యం ఉండాలి, తనతో సఖ్యంగానూ ఉండాలి. బంగారపు ఉయ్యాల ఉండటమంటే ఆ స్థాయిలో మిగతావన్నీ ఉంటాయి కదా. తెలుగు వారికి సేవ చెయ్యాలీ, అది కూడా ఐదు సంవత్సరాలు చెయ్యాలి అంటే 2014 ఎన్నికల్లో తను ఎక్కడ నిలుచున్నా గెలవాలి, ఐదు సంవత్సరాలు నిరంతరాయంగా, ప్రతిపక్షాలతో కానీ మిత్రపక్షాలతో కానీ ఎటువంటి ఆటంకాలు కలుగకూడదు. జన్మదినాన ఎంతో ప్రేమగా అడుగుతున్న జయప్రద కోరికను తిరుమలేశుడు కాదనగలడా చూద్దాం. అయితే తను ఏ రాజకీయ పార్టీ లో చేరేదీ ఈ నెల 30 కి చెప్తానని జయప్రద చెప్తోంది. కాకపోతే, వైయస్ ఆర్ లాంటి నాయకుడు తెలుగువాళ్ళకి చాలా అవసరమన్న తన అభిప్రాయాన్ని కూడా తెలియజేస్తున్న జయప్రద, అప్పటికల్లా రాజకీయ విశ్లేషణ బాగా చెయ్యవచ్చని, జగన్ విషయం కూడా తేలిపోవచ్చని భావిస్తున్నట్టుగా కనిపించారు.