కథ ముగిసింది..

Posted: 04/29/2013 11:37 AM IST

Andhra telugu political news minister sailajanath comment on chandra babu naidu

తెలుగుదేశం అధినేత చంద్రబాబునాయుడుకు భవిష్యత్‌లో ప్రతిపక్ష హోదా కూడా దక్కదని రాష్ట్ర ప్రాథమిక విద్యాశాఖ మంత్రి సాకె శైలజనాథ్‌ జోస్యం చెప్పారు. ఎల్బీ స్టేడియంలో ముస్లిం మైనారిటి బాలికలకు మంత్రి సైకిళ్లు పంపిణీ చేశారు. ఈ కార్యక్రమం అనంతరం మంత్రి విలేకరులతో ప్రత్యేకంగా మాట్లాడుతూ ఈ వ్యాఖ్యలు చేశారు. అధికారంలోకి వస్తే అన్ని మార్చేస్తానంటున్న చంద్రబాబు సంక్షేమ పథకాలను కొనసాగిస్తారా లేదా అనే విషయంపై స్పష్టత ఇవ్వాలని డిమాండ్‌ చేశారు. అసెంబ్లి వేదికగా సమస్యల పరిష్కారం జరుగుతున్న సమయంలో పాదయాత్ర పేరిట పారిపోయిన చంద్రబాబు ప్రతిపక్షనేతగా విఫలమయ్యారని వ్యాఖ్యానించారు. బాబును ప్రజలు శాశ్వతంగా తిరస్కరించారని ఎద్దేవా చేశారు.

ముస్లీం మైనారిటీలకు అధిక ప్రాధాన్యత: రాజీవ్‌ విద్యామిషన్‌ అధికారిక కార్యక్రమములో శైలజనాథ్‌ మాట్లాడుతూ రాష్ట్రంలోని ముస్లిం మైనారిటీ బాలికలు మధ్యలో చదువు మానేయకుండా కొనసాగించేందుకు ప్రభుత్వం అధిక ప్రాధాన్యత నిస్తోందని చెప్పారు. ముస్లిం బాలికల్లో 30 శాతం డ్రాపవుట్లుగా మిగిలిపోతున్నారని అవేదన వ్యక్తం చేశారు. వీరు చదువు కొనసాగేలా పాత నగరంలోని పాఠశాలల్లో 3వేల మంది విద్యా వలంటీర్లను నియమించినట్లు చెప్పారు. 40వేల మంది బాలికలు మదరసాలలో చదివేందుకు సహాయం అందిస్తున్నామని తెలిపారు. 7వ తరగతి చదువుతున్న 26 వేల మంది ముస్లిం బాలికలకు సైకిళ్ళు అందచేస్తున్నామని తెలిపారు. ప్రభుత్వం కల్పిస్తోన్న సౌకర్యాలను వినియోగించుకుని చదువు నిరాటంకంగా కొనసాగిం చాలని సూచించారు.