అతని దూకుడుకు కేసిఆర్ కళ్ళెం?

Posted: 05/28/2013 01:44 PM IST

నిన్నటి వరకు అతని మీద ఆధరపడిన కేసిఆర్ ఇప్పుడు ఒక్కసారిగా మారిపోయాడు. తనలో మరో రూపాన్ని బయటకు తీశాడు. తెలుగుదేశం పార్టీ అధినేత నారా చంద్రబాబు నాయుడు బాటలోనే కేసిఆర్ నడుస్తున్నారు. కాంగ్రెస్ ఎంపీలను పార్టీలోకి ఆహ్వానించడం, తెలంగాణ కాంగ్రెస్ కీలక నేత కేకేను పార్టీలోకి తీసుకొచ్చే విషయమై పావులు కదపడం లాంటి వ్యూహాత్మక అడుగులు వేశారు.

అంతేకా కుండా తిరిగి తెలంగాణ అంశం మొత్తం తనవైపే తిపకునేలా టీడీపీ అధినేత చంద్రబాబుపై తీవ్రంగా విరుచుకుపడడమే కాకుండా కాంగ్రెస్ బీసీ నేత పార్లమెంట్ సభ్యులు మధుయాష్కీపై లేనిపోని మాటలు మాట్లాడి తిరిగి అంతా తనవైపు చూసేలా చేసుకున్నారు. ఇక రాష్ర్టంలోని ప్రధానాంశాలపై ఆయనే సమావేశాలు ఏర్పాటు చేసి ఆయనే మాట్లాడుతున్నారు. శిక్షణ శిబిరాలకు సైతం క్రియాశీలకంగా పాల్గొంటూ కార్యకర్తలకు దిశా నిర్దేశం చేస్తున్నారు. అన్ని పార్టీలను మానసికంగా బలహీనం చేస్తూ.. నేతలు, కార్యకర్తలు టీఆర్‌ఎస్‌వైపు వచ్చేలా వ్యూహం పన్నుతున్నారు. ఏదైనా అంశాల్లో మాట్లాడాల్సి వస్తే.. ఒక్క హరీష్‌రావే కాకుండా పార్టీలోని అధికారిక ప్రతినిధులను, ముఖ్యనాయకులందరినీ ముందు పెడుతున్నారు.

ఈ విధంగా ఒకవైపు హరీష్‌రావుకు ప్రాధాన్యత తగ్గించి ఆయన దూకుడుకు కళ్ళెం వేస్తూనే మరోవైపు తనదైన శైలిలో రాజకీయాలు నడుపుతూ పార్టీని తిరిగి పూర్తిగా తనవశం చేసుకుంటున్నాడు. రెండో స్థానంలో గతంలో ఉన్న హరీష్‌రావుకు బదులు తన కుటుంబం వారసత్వాన్నే దింపాలనే యోచనలో కేసీఆర్ నెమ్మదిగా పావులు కదుపుతున్నారు. చివరకు పార్టీ సంస్థాగత శిక్షణ శిబిరాల్లో సైతం ఎంతో చురుగ్గా పాల్గొనే హరీష్‌రావు ఈ సారి ఒకటి రెండు శిబిరాల తప్ప మిగతా వాటికి దూరంగా ఉన్నారు.

చివరకు హరీష్‌రావుకు గట్టిపట్టున్న సిద్ధిపేట అంసెంబ్లీ స్థానాన్ని సైతం కేసీఆర్ తన ఆధీనంలోకి తీసుకునేందుకు ప్రయత్నిస్తున్నట్లు సమాచారం. ఈ విధంగా ఇప్పటి వరకు టీఆర్‌ఎస్ అంటేనే కేసీఆర్, హరీష్‌రావు అనుకునే పరిస్థితి నుండి నెమ్మదిగా హరీష్‌రావు పార్టీలో అందరి నేతల మాదిరిగానే ఒక నాయకునిగా ఉండిపోయే పరిస్థితి ఏర్పడుతుందని ఆ పార్టీ వర్గాలు వ్యాఖ్యానిస్తున్నాయి.