బాబు క్షమాపణ

Posted: 06/28/2013 08:27 PM IST

చంద్రబాబు సూచనతోనే డెహ్రాడూన్ లో తనపై టిడిపి నేతలు దాడికి దిగారని కాంగ్రెస్ ఎంపీ వి.హనుమంతరావు అన్నారు. ఢిల్లీలో ఆయన మాట్లాడారు. వరద బాధితుల తరలింపులో జనాలను టిడిపి ప్రలోభ పెట్టిందన్నారు. కానీ.. దీని వల్ల బాధితులకు ప్రభుత్వం నుంచి వచ్చే ఎక్స్ గ్రేషియా అందకుండా చేశారని అన్నారు. తెలుగుదేశం పార్టీ శవరాజకీయాలు చేస్తోందని ఆరోపించారు. వారి విమానం ఆ సమయానికి రాకపోయినా.. ప్రభుత్వం ఏర్పాటు చేసిన విమానంలో ఎక్కనీయకుండా బాధితులను అడ్డుకున్నారని చెప్పారు. ఈ విధానాలతో ఎన్నికల్లో ఓట్లు పొందాలని ప్రయత్నిస్తున్నారని ఆరోపించారు. తనపై ఆ పార్టీ నేతలు దాడి చేస్తున్నా.. కనీసం అడ్డుకునేందుకు కూడా ప్రయత్నించలేదని అన్నారు. అయితే చంద్రబాబు ఎంపీ వి. హనుమంతరావు విమర్శలను సుత్తిమెత్తగా ఖండించారు. ఉత్తరాఖండ్ వరద బాధితుల విషయమై తెలుగుదేశం, కాంగ్రెసు పార్టీ పార్లమెంటు సభ్యుల మధ్య జరిగిన ఘర్షణ పైన తెలుగుదేశం పార్టీ అధ్యక్షుడు నారా చంద్రబాబు నాయుడు క్షమాపణ చెప్పారు. ఆ విషయంలో తెలుగుదేశం పార్టీ తప్పు ఏమీ లేదని చంద్రబాబు ఆ రోజే చెప్పారు. అయితే వరదల సమయంలో ఇలాంటి ఘర్షణలు సరికావని అన్న చంద్రబాబు, ఈ ఘటనపై తాను జాతియావత్తుకు క్షమాపణ చెబుతున్నానని అన్నారు. ఢిల్లీలో జరిగిన ఘటన తనను చాలా బాధించిందని అన్నారు. ఎపి భవన్ ఢిల్లీలో కట్టింది తెలుగు వారి కోసమే అన్నారు. ఉత్తరాఖండ్ ముఖ్యమంత్రి విజయ బహుగుణను కలిసి బాధితుల సమస్యలను తాను వివరించానని అన్నారు. తాను మానవతా దృక్పథంతోనే సహాయం కోసం ముందుకు వచ్చానని చెప్పారు.