తెలుగు సినిమాకు అవమానం జరిగింది

Posted: 09/25/2013 08:59 PM IST

Centenary celebrations of indian cinema disgrace to telugu film

ఇటీవల చెన్నై భారతీయ సినిమా వందేళ్ల పండగలు ఘనంగా ముగిశాయి. ఈ సినిమా వేడుకల్ని ఎంతో అంగరంగ వైభవంగా ఎంతో ఖర్చు పెట్టి నిర్వహించారు. ఎంతో మంది అతిరథ మహారథులు వచ్చారు. ఈ సంబరాలు అంబరాన్నంటాయి. చివరి రోజున ఈ వందేళ్ళలో సినీ చరిత్రలో ఉన్న సినీ ప్రముఖలందరిని రాష్ట్రపతి చే సన్మానం కూడా చేయించారు. ఇంత వరకు బాగానే ఉన్నా ఈ ఉత్సవాలలో తెలుగు వారికి, సినీ కళామతల్లికి అవమానం జరిగిందని ప్రముఖ నిర్మాత కాట్రగడ్డ మురారి మండిపడ్డారు. ఈ ఉత్సవ నిర్వాహకులు అసలు సీనియర్లెవరీని పిలవకుండా గౌరవం ఇవ్వలేదని, చెన్నైకి చెందిన పరిశ్రమ సీనియర్లలో చాలామందిని కనీసం ఆహ్వానించలేదని, వెన్నెలకంటి రాజేశ్వర ప్రసాద్, భువనచంద్ర లాంటివారిని కూడా పిలవలేదని మురారి చెప్పారు. తనను పిలుస్తారని చెప్పినా, ఎవరూ కనీసం ఫోన్ కూడా చేయకపోవడంతో వెళ్లకూడదని నిర్ణయించుకున్నానన్నారు. ఎవరినైనా సత్కరించాలనుకుంటే వారికి ముందుగా చెప్పాలని, చిట్టచివరి నిమిషంలో వచ్చి అవార్డు తీసుకోమని చెబితే కుదరదని అన్నారు. ఆ ఉత్సవాలకు వెళ్లిన తెలుగు పరిశ్రమ ప్రముఖులు కూడా స్టేజీ పై తన ఆదేనను వ్యక్తం చేశారు. దర్శక నిర్మాత, నటుడు ఆర్. నారాయణమూర్తి కార్యక్రమం మధ్యలోనే బయటకు వచ్చేసిన విషయం తెలిసిందే. సీనియర్ నటి కవిత 150కి పైగా చిత్రాల్లో నటించానని, అగ్రహీరోలు అందరి సరసన హీరోయిన్గా చేశానని, అలాంటి తనను కనీసం పిలవను కూడా పిలవలేదని కవిత అయితే కంటనీరు పెట్టారు. మహేష్ బాబు, ప్రభాస్, మోహన్ బాబు, దాసరి నారాయణరావు.. ఇలా చాలామంది ప్రముఖులు అసలీ ఉత్సవాలకు హాజరు కాలేదు. అయితే, ఇంత పెద్ద కార్యక్రమాలు నిర్వహించేటప్పుడు చిన్నచిన్న పొరపాట్లు తప్పవని నిర్మాత, దక్షిణ భారత ఫిల్మ్ ఛాంబర్ ఆఫ్ కామర్స్ చైర్మన్ చిల్లర కళ్యాణ్ అన్నారు.