విభజించాలంటే సవరించాల్సిందే..

Posted: 10/30/2013 10:46 AM IST

రాష్ట్ర విభజన అంశానికి సంబంధించి రాజ్యంగంలోని ఆర్టికల్ 371-డి అంశానికి ఏం చేయాలనే విషయం పై కేంద్రం తర్జన భర్జన పడుతున్న విషయం తెలిసిందే. రాష్ట్ర విభజన సాఫీగా సాగాలంటే రాజ్యాంగంలోని 371-డి అధికరణాన్ని సవరించాల్సిందేనని కేంద్రం తేల్చిచెప్పేసింది. రాష్ట్ర విభజన తరువాత కొత్తగా ఏర్పడే రాష్ట్రంలో స్థానికులకు విద్య, ఉపాది అవకాశాల్లో సమాన అవకాశాలు కల్పించేందుకు హైదరాబాద్ లోని వారికి రక్షణ కల్పించడానికి 1973లో జారీ అయిన ఈ అధికరణాన్ని సవరించక తప్పదని కేంద్ర హోంశాఖ స్పష్టం చేసింది.

రాష్ట్ర విభజన విధివిధానాల ఖరారుకు ఏర్పాటైన కేంద్ర మంత్రుల బృందానికి అందజేసిన నేపథ్య పత్రం (బ్యాక్‌గ్రౌండ్ నోట్)లో ఈ విషయాన్ని ప్రధానంగా పేర్కొంది. జీవోఎం లోతుగా దృష్టి సారించాల్సిన నాలుగు ప్రాథమ్య అంశాల్లో దీన్ని హోం శాఖ ప్రధానంగా చేర్చింది. ఆంధ్రప్రదేశ్‌ను విభజిస్తున్నందున ప్రభుత్వోద్యోగాల్లో స్థానికులకు సముచితమైన రిజర్వేషన్లు కల్పించే ప్రక్రియ రెండు రాష్ట్రాల్లోనూ యథావిధిగా కొనసాగుతుంది. కాబట్టి 371-డి అధికరణాన్ని సవరించడంతో పాటు హైదరాబాద్‌లో విద్య, ఉపాధి అవకాశాల విషయమై ఇతర రక్షణ చర్యలేవైనా చేపట్టడం ద్వారా రాష్ట్రపతి ఉత్తర్వులను పునర్వ్యవస్థీకరించాల్సిన అవసరముంద అని అందులో స్పష్టంగా పేర్కొంది.

విభజన అనంతరం ఏర్పడబోయే రెండు రాష్ట్రాల మధ్య గోదావరి, కృష్ణా తదితర నదీ జలాల పంపకాలకు సంబంధించిన అన్ని వ్యవహారాలనూ సజావుగా పర్యవేక్షించేందుకు పూర్తి అధికారాలతో కూడిన చట్టబద్ధమైన, స్వతంత్ర సాంకేతిక జల నిర్వహణ బోర్డును ఏర్పాటు చేయాలని కూడా సూచించింది. రాష్ట ఖజానాకు చేరుతున్న అమ్మకం పన్నులో 75 శాతం హైదరాబాద్ నుండే వస్తుస్తున్నట్లు మిగిలింది కోస్తాంధ్ర, రాయల సీమ తెలంగాణ నుండి వస్తున్నట్లు తెలిపింది. పోలవరం, ప్రాణహిత చేవెళ్ళ ప్రాజెక్టులు రెండూ జాతీయ ప్రాజెక్టుల పరిశీలనలో ఉన్నట్లు గుర్తుచేసింది. జల వనరులు, విద్యుత్ వనరులు, హైదరాబాద్ నగరం, 371-డి అధికరణం-రాష్ట్రపతి ఉత్తర్వులు... ఈ నాలుగింటిని ప్రాథమ్యాంశాలుగా పేర్కొంది. వాటిపై ప్రధానంగా దృష్టి పెట్టి, లోతుగా పరిశీలించాల్సిందిగా జీవోఎంను కోరింది.