నల్లబడుతున్న చర్మం కాంతివంతంగా మెరువాలంటే...

Posted: 10/10/2014 06:50 PM IST

సాధారణంగా ప్రతిఒక్కరు తమతమ కార్యకలాపాలను, ఇతర పనులను నిర్వహించుకోవడం కోసం బయట ప్రదేశాల్లో తిరుగుతుంటారు. ఆ సమయాల్లో సూర్యరశ్మి వల్ల చర్మం నల్లగా మారడం జరుగుతుంది. ఎండలో ఎక్కువగా తిరగడం వల్ల చర్మం నల్లబడటాన్ని ‘‘సన్ టాన్’’ అంటారు. సూర్యరశ్మిలోని హానికరమైన యూవీ కిరణాలు నేరుగా చర్మం మీద పడటం వల్ల నల్లగా మారడం జరుగుతుంది. అలాగే వాతావరణంలో కాలుష్యం, ధుమ్ముధూళి చర్మం మీద పడటం వల్ల అవి చర్మం మీద తమ ప్రభావంతో నల్లగా మారుస్తాయి. అలాంటప్పుడు నల్లగా మారిన చర్మాన్ని తిరిగి కాంతివంతంగా మెరుగుపరుచుకోవాలంటే కొన్ని హోమ్ రెమెడీస్ అందుబాటులో వున్నాయి.

1. బేకింగ్ సోడా పేస్ట్ : బేకింగ్ సోడాను నీళ్లలో వేసి బాగా మిక్స్ చేసుకోవాలి. నల్లగా మారిన ప్రదేశాల్లో దానిని అప్లై చేసుకోవాలి. ఇలా రోజుకొకసారి అమలుచేసుకుంటే.. త్వరలోనే మంచి ఫలితం లభిస్తుంది.

2. తేనే - నిమ్మరసం పేస్ట్ : సరిపడ పరిమాణంలో తేనె, నిమ్మరసాన్ని బాగా మిక్స్ చేసుకోవాలి. ఈ మిశ్రమాన్ని నల్లగా మారిన ప్రదేశాల్లో అప్లై చేసుకోవాలి. 15 నిముషాల తర్వాత చల్లని నీటితో శుభ్రం చేసుకోవాలి.

3. కీరదోసకాయ రసం : కొద్దిగా కీరదోసకాయ రసం తీసుకుని అందులో నిమ్మరసం, రోజ్ వాటర్ బాగా మిక్స్ చేసుకోవాలి. ఈ మిశ్రమాన్ని నల్లగా మారిన ప్రదేశాల్లో అప్లై చేసుకోవాలి. 15 నిముషాల తర్వాత చల్లని నీటితో శుభ్రం చేసుకోవాలి.

4. నిమ్మరసం : నిమ్మరసాన్ని బాగా పిండుకున్న తరువాత అందులో కాటన్ బాల్స్ లేదా పత్తిని ముంచి.. దానిని నల్లగా వున్నప్రదేశాల్లో అప్లై చేసుకోవాలి. 5 నిముషాల బాగా మసాజ్ చేసుకొని, 15 నిముషాలవరకు వుంచుకోవాలి. పూర్తిగా డ్రై అయిన తర్వాత చల్లని నీటితో కడుక్కోవాలి.

5. శెనగపిండి : కొద్దిగా శెనగపిండి తీసుకుని.. అందులో పెరుగు, నిమ్మరసాన్ని బాగా మిక్స్ చేసుకోవాలి. ఈ పేస్ట్ ను నల్లగా మారిన ప్రదేశాల్లో బాగా మసాజ్ చేసుకోవాలి. బాగా ఎండిన తర్వాత గోరువెచ్చని నీటితో శుభ్రం చేసుకోవాలి.

6. పసుపు : నిమ్మరసం, పచ్చిపాల్లో కొద్దిగా పసుపు కలిపి బాగా మిక్స్ చేసుకోవాలి. దీనిని నల్లగా వున్న ప్రదేశాల్లో అప్లై చేసుకుని, 10 నిముషాలవరకు బాగా ఆరబెట్టుకోవాలి. అనంతరం చల్లని నీటితో శుభ్రం చేసుకోవాలి.

7. కొబ్బరినీళ్లు : నల్లగా మారిన ప్రదేశాల్లో కొబ్బరి నీళ్లతో మర్దన చేసుకుంటే మంచి ఫలితం లభిస్తుంది. రోజుకు రెండుసార్లు చేసుకుంటే.. ఎఫెక్టివ్ గా వుంటారు.