బంగాళదుంపతో జుట్టుసమస్యకు చెక్..

Posted: 11/27/2014 06:03 PM IST

వివిధరకాల జుట్టు సమస్యలను నివారించుకోవడానికి మార్కెట్లో చాలారకాల ఉత్పత్తులు, పద్ధతులు అందుబాటులో వున్నాయి కానీ.. వాటిని రెగ్యులర్’గా వాడటం వల్ల అందులో వుండే రసాయనాలు మెదడుకు ఇబ్బంది కలగించవచ్చు. కాబట్టి కృత్రిమంగా తయారుచేసే క్రీములను నిరంతరం వాడటం కంటే సహజంగా లభించే కొన్ని ఆహారపదార్థాల ద్వారా జుట్టు సమస్యలను శాశ్వతంగా నివారించుకోవచ్చు.

సహజంగా లభించే పదార్థాల్లో పోషక విలువలు అధిక మోతాదులో వుంటాయి కాబట్టి వాటితో ప్రయోజనాలే కలుగుతాయి కానీ ఎటువంటి ఇబ్బందులు కలగవు. అటువంటి వాటిల్లో బంగాళదుంప కూడా ఒకటి! ఇది జుట్టు సమస్యలను పూర్తిగా అరికట్టడంలో తనదైన పాత్రను పోషిస్తుంది. ఇది అతిపెద్ద నాలుగో పోషకాహారంగా పేరుగాంచింది కూడా. మరి ఇటువంటి దుంపతో జుట్టు సమస్యలను ఎలా అరికట్టవచ్చో తెలుసుకుందాం..

1. బంగాళదుంపను తీసుకొని దానిని ఒక నీటిలో బాగా పిండేయాలి. అందులో గుడ్డు, పెరుగు బాగా కలిపి, ప్యాక్’లా తయారుచేసుకోవాలి. దీనిని జుట్టుకు, మూలాలకు బాగా పట్టించాలి. 20 నిముషాల తర్వాత వెచ్చని నీటితో, సాధారణ షాంపూతో శుభ్రం చేసుకోవాలి. ఇలా 20 రోజులవరకు చేసుకుంటే మంచి ఫలితం దక్కుతుంది.

2. బంగాళదుంపపై వున్న తొక్కను బాగా తీసేసి పక్కనపెట్టుకోవాలి. ఒక పాన్’లో తగినంత నీరు పోసి బాగా కాచుకోవాలి. ఆ కాచిన నీటిలో పక్కన తీసిపెట్టుకున్న బంగాళదుంప పొట్టు వేసి 20 నిముషాలు మరిగించాలి. అనంతరం ఆ నీటిని ఒక గిన్నెలో వడకట్టాలి. జుట్టును సాధారణ షాంపూతో శుభ్రం చేసుకున్న తర్వాత ఆ మరిగించి వడకట్టిన నీటితో మళ్లీ జుట్టును శుభ్రం చేసకోవాలి. ఇది జుట్టుకు సహజ నలుపురంగు అందివ్వడంలో సహాయపడుతుంది. ఇలా వారంరోజులు చేస్తే మంచి ఫలితం దక్కుతుంది.

3. మూడు స్పూన్స్ బంగాళదుంప రసం,మూడు స్పూన్స్ కలబంద రసం,రెండు స్పూన్స్ తేనే తీసుకుని బాగా కలుపుకోవాలి. ఈ మిశ్రమాన్ని తలకు బాగా పట్టించి, రెండుగంటల తర్వాత సాధారణ షాంపూతో శుభ్రం చేసుకోవాలి. వారంలో రెండుసార్లు ఇలా చేసుకుంటే జుట్టు రాలే సమస్య తగ్గుతుంది.