ఆయిల్ స్కిన్ కు చెక్ పెట్టే ఫేస్ ప్యాక్స్

Posted: 04/04/2015 03:22 PM IST

ఆయిల్ స్కిన్ వున్నవారు దాన్నుంచి ఉపశమనం పొందేందుకు ఎన్ని ప్రయత్నాలు చేసినా.. అంతగా ఫలితం లభించదు. బ్యూటీ ప్రోడక్ట్స్ కొద్దిసేపటి వరకు దాన్నుంచి విముక్తి కలిగించినప్పటికీ.. తిరిగి చర్మం యథాస్థానానికి చేరుతుంది. ఇలాంటి పరిస్థితుల్లో దీని నుంచి రిలీఫ్ పొంది, మెరుగైన సౌందర్యం పొందాలంటే అందుకు కొన్ని ఫేస్ ప్యాక్స్ వున్నాయి. వీటిని ముఖానికి పట్టించినప్పుడు ఎంతో సమర్థవంతంగా పనిచేసి, చర్మసౌందర్యాన్ని పెంచుతాయి. మరి.. ఆ ఫేస్ ప్యాక్స్ ఏంటో తెలుసుకుందామా..

1. ముల్తానీ మట్టి ఫేస్ ప్యాక్ : ముల్తాని మట్టికి కొద్దిగా రోజ్ వాటర్ మిక్స్ చేసి, పేస్టులా తయారుచేసుకోవాలి. ఈ పేస్టును ముఖానికి పట్టించి 20 నిముషాల వరకు అలాగే వుంచుకోవాలి. అనంతరం గోరువెచ్చని నీరుతో శుభ్రం చేసుకోవాలి. ఈ ఫేస్ ప్యాక్ ను వారానికి రెండుసార్లు ముఖానికి పట్టిస్తే.. అది చర్మంలోని ఎక్సెస్ ఆయిల్‌ను గ్రహించి చర్మాన్ని కాంతివంతంగా మార్చుతుంది. అలాగే చర్మ రంద్రాలను శుభ్రం చేసి, బ్లాక్ హెడ్స్‌ను నివారిస్తుంది. తద్వారా ముఖంలో మంచి గ్లో వస్తుంది.

2. పసుపు-శెనగపిండి ప్యాక్ : పసుపు, శెనగపిండిని రెండింటిని కొద్దికొద్దిగా ఒక బౌల్లో వేసి మిక్స్ చేయాలి. అనంతరం అందులో కొద్దిగా పాలు పోసి పేస్ట్ చేయాలి. ఈ పేస్ట్‌ను ముఖానికి మాస్క్‌లా వేసుకని, కొద్దిసేపటివరకు అలాగే వుంచుకోవాలి. అనంతరం నీటితో శుభ్రంగా కడిగేసుకోవాలి. ఇలా చేస్తే.. ఈ ప్యాక్ చర్మంలోని ఎక్సెస్ ఆయిల్‌ను నివారించడంతో పాటు, డెడ్ స్కిన్ సెల్స్‌ను నివారిస్తుంది.
 
3. విటమిన్ సి కలిగిన పండ్లతో ప్యాక్ : ఆరెంజ్, స్ట్రాబెర్రీ, పైనాపిల్, టమోటోలతోపాటు అన్ని రకాల పండ్లలోనూ విటమిన్ సి పుష్కలంగా ఉంటుంది. ఈ విటమిన్ కలిగివున్న ఏదైనా ఓ పండును తీసుకుని.. దాన్ని మెత్తని పేస్టులా చేసుకోవాలి. ఆ పేస్టును ముఖానికి పట్టించి, కొద్దిసేపటి తర్వాత శుభ్రం చేసుకోవాలి. ఇది చర్మంలోని ఎక్సెస్ ఆయిల్‌ను తొలగిస్తుందని బ్యూటీషన్లు సూచిస్తున్నారు.