ఖర్భూజ, స్ట్రాబెర్రీ ప్యాక్ తో మృదువైన చర్మసౌందర్యం..

Posted: 04/06/2015 04:15 PM IST

సూర్యతాపం ప్రభావానికి చర్మసౌందర్యం క్షీణిస్తుంది. ముందుగా చెమటలు రావడంతో ముఖం జిడ్డుగా మారుతుంది. ఆ తర్వాత దుమ్ము, ధూళి చేరిపోవడంతో ముఖం మరింత వికారంగా కనిపిస్తుంది. అప్పుడు మొటిమలు, నల్లని ఛాయలు వంటి రావడం, చర్మం పొడిబారిపోవడం, ముసలితనం వచ్చినట్లు వంటి లక్షణాలు కనిపిస్తాయి. ఇటువంటి పరిస్థితుల్లో ఈ చర్మ సమస్యల నుంచి ఉపశమనం పొంది, సౌందర్యాన్ని మరింత మెరుగుపర్చుకోవాలంటే అందుకు అనుగుణంగా కొన్ని బ్యూటీ ప్యాక్స్ అందుబాటులో వున్నాయి. అటువంటి వాటిలో ఖర్బూజ-స్ట్రాబెర్రీ ప్యాక్, ఖర్భూజ-శెనగపిండి ప్యాక్ లు వున్నాయి. వీటిని నిత్యం చర్మానికి పట్టిస్తే.. త్వరలోనే ఫలితాన్ని గమనించవచ్చు.

ఖర్బూజ-స్ట్రాబెర్రీ ప్యాక్ : ఒక పాత్ర తీసుకుని అందులో మస్క్ మెలోన్ ముక్కలు, స్ట్రాబెర్రీ 3 వేసి బాగా కలుపుకోవాలి. అనంతరం అందులో ఒక చెంచా ఓట్ మీల్, ఒక చెంచా తేనె వేసి మిక్స్ చేయాలి. ఈ మిశ్రమాన్ని శరీరం, ముఖం, మెడకు అప్లై చేసి స్ర్కబ్ చేయాలి. 15నిముషాల తర్వాత మంచి నీటితో శుభ్రం చేసుకోవాలి. ఇలా వారానికి ఒకసారి చేసుకుంటే... చర్మం తేమగా, మృదువుగా, ప్రకాశవంతంగా మారుతుంది.

ఖర్భూజ-శెనగపిండి ప్యాక్ : ఒక గిన్నెలో ఒక కప్పు మస్క్ మెలోన్ జ్యూస్ తీసుకొని అందులో శెనగపిండి వేసి మిక్స్ చేయాలి. ఈ మిశ్రమాన్ని పేస్టులా వచ్చేంతవరకు మిక్స్ చేయాలి. అనంతరం బాడీ మొత్తం స్క్రబ్ చేయాలి. ఇలా చేసిన 15 నిముషాల తర్వాత గోరువెచ్చని నీటితో శుభ్రం చేసుకోవాలి. ఈ విధంగా ఈ ప్యాక్ పట్టించడం వల్ల చర్మం అందంగా.. ఆకర్షణీయంగా మారుతుంది. దీన్ని వారానికోసారి ట్రై చేయాలి.