చర్మాన్ని తెల్లగా మార్చే ప్యాక్స్

Posted: 06/23/2015 11:08 AM IST

చర్మసౌందర్యాన్ని మరింత మెరుగుపర్చుకునేందుకు కొందరు రకరకాల బ్యూటీ ప్రోడక్ట్స్ తోపాటు ఇంట్లోనే కొన్ని ప్రత్యేకమైన రెమెడీలు తయారుచేసుకుని ముఖానికి పట్టిస్తుంటారు. ఇలా ఒకదాని తర్వాత మరొకటి వెనువెంటనే ముఖానికి పట్టించుకోవడం అందం మెరుగయ్యే విషయం ఏమోగానీ.. రకరకాల చర్మసమస్యలు మాత్రం వస్తాయి. అంతవరకు బాగానే వుండే ముఖం క్రమక్రమంగా అందవిహీనంగా తయారవుతూ వస్తుంది.

కాబట్టి.. అలా కాకుండా సింపుల్ గా కొన్ని చిట్కాలు పాటిస్తే చాలు. చర్మ ఆరోగ్యంగా వుండటంతోపాటు సౌందర్యం మెరుగవుతుంది. చర్మసౌందర్యం మెరుగుపరుచుకోవడం కోసం కొన్ని ఫేస్ ప్యాక్స్ అందుబాటులో వున్నాయి. ఈ ప్యాక్స్ ని ఇంట్లోనే ట్రై చేస్తే.. మంచి ఫలితాలను పొందవచ్చునని నిపుణులు అంటున్నారు. మరి.. ఆ ఫేస్ ప్యాక్స్ ఏంటో తెలుసుకుందామా..

* బాదం ఫేస్ ప్యాక్ : బాదంలో విటమిన్ ఈ పుష్కలంగా ఉంటుంది. ఇది చర్మాన్ని ఆరోగ్యంగా వుంచడంతోపాటు సౌందర్యాన్ని మెరుగుపరచడంలో చాలా గ్రేట్‌గా సహాయపడుతుంది. బాదంను నీళ్ళలో రాత్రంతా నానబెట్టి, ఉదయం మిక్సీలో వేసి అందులో కొద్దిగా పాలు వేసి గ్రైండ్ చేయాలి. పేస్టులా తయారైన ఈ మిశ్రమాన్ని ముఖానికి అప్లై చేసి మృదువుగా మసాజ్ చేయాలి. ఇలా వారానికి రెండుమూడు సార్లు చేస్తే.. క్రమంగా ఫెయిర్ స్కిన్ పొందవచ్చు.

* శెనగపిండి ఫేస్ ప్యాక్ : శెనగపిండిలో వుండే పోషకాలు చర్మానికి ఎంతో మేలు కలిగిస్తాయి. కొద్దిగా శెనగపిండిని తీసుకుని నీళ్లలో వేసి బాగా కలియబెట్టాలి. పేస్టులా తయారుచేసుకున్న ఈ మిశ్రమంలో కొద్దిగా పసుపు మిక్స్ చేయాలి. అనంతరం దీనిని ముఖంపై రాసుకోవాలి. కొద్దిసేపు అలాగే వుంచుకున్న తర్వాత పేస్టును ముఖం మీద నుంచి తీసేయాలి. తర్వాత గోరువెచ్చని నీటితో శుభ్రంగా కడిగేసుకోవాలి. ఇలా చేస్తే.. చర్మం మృదువుగా మారుతుంది.

* పుదీనా ఫేస్ ప్యాక్ : పుదీనా ఆకులు చర్మాన్ని తాజాగా, కూల్‌గా మార్చుతాయి. పుదీనా ఆకులను నీళ్లలో వేసి బాగా కడిగేసుకోవాలి. అనంతరం ఆకులను పేస్టులా కలుపుకోవాలి. ఈ పేస్టును ముఖానికి ప్యాక్‌గా వేసుకోవాలి. ఇలా వేసుకోవడం వల్ల ఈ ప్యాక్ చర్మ రంద్రాలను తెరచుకునేలా చేస్తుంది. దాంతో చర్మఛాయాలో మార్పు వస్తుందని బ్యూటీషన్లు అంటున్నారు.