టమోటా రెమెడీలతో మేనిఛాయ చర్మం

Posted: 09/09/2015 12:27 PM IST

రెగ్యులర్ వంటకాల్లో ఉపయోగించే టమోటాలు పోషకాల పుట్ట అని ఆరోగ్య నిపుణులు అంటారు. ఇతర కూరగాయలతో పోల్చితే.. టమోటాలో వున్న పోషకాలు, విటమిన్లూ మరే దానిలో వుండని వారంటున్నారు. ఈ టమోటా కేవలం ఆరోగ్యాన్ని మాత్రమే కాదు.. అందాన్ని కూడా రెట్టింపు చేస్తుంది. అందుకే.. నిత్యం వంటకాల్లో దీనిని వేస్తే ఎంతో శ్రేయస్కరం. ఈ టమోటాతో రకరకాల రెమెడీలు చేసుకుని ముఖానికి పట్టిస్తే.. మంచి ఫలితం దక్కుతుందని బ్యూటీషియన్లు అంటున్నారు. మొటిమలు, ముడతలు, నల్లటి వలయాలు, సన్ టాన్ తదితర సమస్యల్ని నివారించడంలో ఇది సమర్థవంతంగా పనిచేస్తుంది.

* ఒక గాజు పాత్ర తీసుకుని అందులో ఒక టమోటోని మెత్తగా చేసి వేయాలి. అనంతరం దాంట్లో చెంచా పెరుగూ, అరచెంచా తేనె, మూడు చెంచాల సెనగపిండీ వేసి బాగా కలపాలి. ఈ మిశ్రమాన్ని ముఖానికి పూతలా వేసుకుని, ఆరేంతవరకు అలాగే వుంచుకోవాలి. అనంతరం శుభ్రంగా కడిగేసుకోవాలి. ఇలా రెగ్యులర్ గా చేస్తే.. ముఖంపై వుండే మొటిమలు, ముడతలు తొలగిపోయింది.. మేనిఛాయను పొందుతారు.

* ఒక పాత్ర తీసుకుని అందులో ఓ చెంచా టొమాటో రసం, ఓ స్పూన్ తేనె వేసి బాగా కలుపుకోవాలి. గాఢంగా కలిపిన ఈ మిశ్రమాన్ని ముఖానికి పట్టించి, కాసేపు మర్దన చేసుకోవాలి.  పావుగంట తర్వాత గోరువెచ్చని నీళ్లతో శుభ్రంగా కడిగేసుకోవాలి. ఇలా రెగ్యులర్ గా చేస్తే.. చర్మం మెరుగవడంతోపాటు మృదువుగా మారుతుంది.

* రెండు చెంచాల టమోటో గుజ్జులో, చెంచా కీరదోస గుజ్జూ, రెండు చెంచాల ఓట్స్ పొడీ, చెంచా పుదీనా ఆకుల మిశ్రమం తదితరాలు వేసి బాగా కలుపుకోవాలి. ఈ మిశ్రమాన్ని ముఖానికి రాసి పావు గంటయ్యాక గోరువెచ్చని నీళ్లతో కడిగేయాలి. ఇలా చేయడం వల్ల ముఖానికి తాజాదనం వస్తుంది.

* ఒక గిన్నె తీసుకుని అందులో రెండు చెంచాల టమోటో రసం, మూడు చెంచాల మజ్జిగ వేసి బాగా కలపుకోవాలి. ఈ మిశ్రమాన్ని ముఖానికి పట్టించి అరగంట తర్వాత చన్నీళ్లతో కడిగేసుకోవాలి. ఇలా రెగ్యులర్ గా చేస్తే.. చర్మంపై వుండే మురికి తొలగిపోయి.. ముఖం తాజాగా మారుతుంది.

* ఒక టమోటోని గుజ్జులా చేసి దానికి చెంచా నిమ్మరసం, అర చెంచా ఓట్స్ పొడీ వేసి బాగా కలుపుకోవాలి. ఈ మిశ్రమాన్ని ముఖానికి రాసుకుని, కాసేపు వేళ్లతో రుద్దాలి. తరువాత చన్నీళ్లతో కడిగేయాలి. ఇలా చేయడం వల్ల చర్మం మృదువుగా మారుతుంది.