మొటిమలకు చెక్ పెట్టే ఎఫెక్టివ్ రెమెడీలు

Posted: 10/12/2015 03:56 PM IST

యుక్తవయస్సులో ప్రతిఒక్కరిని వేధించే సమస్య ‘మొటిమలు’. వీటిని నిర్మూలించేందుకు నానారకాల ప్రయత్నాలు చేస్తుంటారు. రెగ్యులర్ గా ఏదో ఒక బ్యూటీ ప్రోడక్ట్ ను ఉపయోగించడమో, బ్యూటీ పార్లర్ కు వెళ్లడమో, ఇంకా ఇతర పద్ధతుల్ని అనుసరిస్తుంటారు. అయినప్పటికీ ఆ మొటిమలు అంత త్వరగా వెళ్లిపోవు. కాగా.. చర్మ సంబంధిత సమస్యలు పెరిగే అవకాశం కూడా వుంటుంది. అలాంటప్పుడు కొన్ని ఎఫెక్టివ్ చిట్కాలు పాటిస్తే.. వీటి నుంచి త్వరగా ఉపశమనం పొందడంతోపాటు మెరుగైన సౌందర్యం పొందవచ్చునని నిపుణులు చెబుతున్నారు. మరి.. ఆ చిట్కాలేంటో తెలుసుకుందామా..

* ఒక పాత్రలో కొత్తిమీర రసం తీసుకుని అందులో చిటికెడు ఉప్పు వేసి బాగా కలుపుకోవాలి. ఈ మిశ్రమాన్ని ముఖానికి రాసి అరగంట తర్వాత చన్నీటితో కడిగేసుకోవాలి. ఇలా రెగ్యులర్ గా చేస్తే.. మొటిమలు తొలగిపోతాయని ఆయుర్వేద నిపుణులు అంటున్నారు.

* ఒక గ్లాస్ పాత్ర తీసుకుని అందులో కొద్దిగా ఆలివ్ ఆయిల్‌, కాస్త కర్పూరం వేసి బాగా కలుపుకోవాలి. ఈ మిశ్రమాన్ని రోజూ పడుకునే ముందు ముఖానికి రాసుకుంటే మొటిమలు తగ్గిపోతాయి. అలాగే ఆవిరిపెడితే.. ముఖం మీద వుండే నల్లమచ్చలు త్వరగా తొలగిపోతాయి.

* ఒక పాత్రలో నిమ్మకాయ రసం, కోడిగుడ్డులో తెల్లసొన, పసుపు సమపాళ్ళలో వేసి బాగా కలుపుకోవాలి. ఈ మిశ్రమాన్ని ముఖానికి పట్టించి పది నిముషాల తర్వాత కడగాలి. ఈ విధంగా వారానికి ఒకసారి చేయాలి. ఇలా రెగ్యులర్ గా చేస్తే.. మొటిమలు మటుమాయమవుతాయి.

* ఒక పాత్రలో కాస్త పెరుగు తీసుకుని అందులో కొద్దిగా పసుపు వేసి బాగా కలుపుకోవాలి. ఈ మిశ్రమాన్ని పొట్టమీద క్రమం తప్పకుండా రాసుకుంటే గర్భం ధరించినప్పుడు పొట్టమీద ఏర్పడ్డ చారలు తగ్గిపోతాయి.