మెరుపులీనే ముఖ సౌందర్యానికి ఫ్రూట్ ప్యాక్స్

Posted: 10/13/2015 12:46 PM IST

Healthy fruit packs to get shiny glow skin home remedies skincare tips

ముఖసౌందర్యాన్ని మెరుగుపరుచుకోవాలంటే.. ఎక్కువ ధరలతో కూడిన బ్యూటీ ప్రోడక్టులను వినియోగించడం కంటే సహజంగా లభ్యమయ్యే కొన్ని ఫ్రూట్స్ ద్వారా ప్యాక్స్ చేసుకుని ముఖానికి పట్టిస్తే సరిపోతుందని బ్యూటీషియన్లు అంటున్నారు. అందులో వుండే పోషకాలు చర్మం సహజత్వం కోల్పోకుండా చేయడంతోపాటు సౌందర్యాన్ని మెరుగుపరచడంలో సమర్థవంతంగా పనిచేస్తాయి. పైగా.. ఈ ఫేస్ ప్యాక్స్ ఎక్కువ ధరలతో కూడినవి కావు కూడా! మరి.. ఆ ఫ్రూట్ ఫ్యాక్స్ ఏంటో తెలుసుకుందామా...

* టమోటా : టమోటా రుచికరమైన ఆహారం తయారీకే కాదు, చర్మ సౌందర్యాన్ని మెరుగుపర్చడంలోనూ ఉపయోగపడుతుంది. జిడ్డు చర్మం ఉన్నవారికి టొమాటో మాస్క్‌ చాలా బాగా పనిచేస్తుంది. టొమాటోను పిండి ఆ రసాన్ని ముఖానికి రాసుకోవాలి. కాసేపు అలాగే ఉంచుకున్న తర్వాత ముఖాన్ని నీళ్లతో కడిగేసుకోవాలి. ఇలా రెగ్యులర్ గా చేస్తే మంచి ఫలితం వుంటుంది.

* ద్రాక్షపళ్లు : ద్రాక్షాపళ్లు మొటిమలను దూరం చేస్తాయి. ద్రాక్షపళ్ల గుజ్జును ముఖానికి రాసుకుంటే మంచి ఫలితాలు ఉంటుంది. ద్రాక్షపళ్ల గుజ్జును ముఖానికి రాసుకుని అది ఎండిపోయేవరకూ అలాగే ఉంచుకోవాలి. ఆ తర్వాత చల్లటి నీళ్లతో ముఖాన్ని కడిగేసుకోవాలి. ద్రాక్షపళ్ల ఫేస్‌ ప్యాక్‌తో మొటిమలతోపాటు ముఖం మీద ఏర్పడ్డ చిన్నమచ్చలు సైతం పోతాయి.

* అరటి పండ్లు : అరటి పండును బాగా మగ్గించి, దాన్ని మెత్తగా గుజ్జులా చేయాలి. ఆ గుజ్జును ముఖానికి రాసుకోవాలి. మొటిమల సమస్య ఉంటే గుజ్జుకు కొంచెం తేనె లేదా నిమ్మరసం కలిపి ముఖానికి రాసుకుని 20 నిమిషాల పాటు అలాగే ఉంచుకోవాలి. ఆ తర్వాత గోరువెచ్చని నీరుతో శుభ్రం చేసుకోవాలి. ఇలా చేస్తే ముఖవర్ఛస్సు పెరుగుతుంది.

* యాపిల్ పండు : యాపిల్‌ పండును గుజ్జులా చేసి దానిలో కొద్దిగా తేనె కలపాలి. ఆ పేస్టును ఫ్రిజ్‌లో పది నిమిషాలు ఉంచాలి. ఆ తర్వాత దాన్ని బయటకు తీసి ముఖానికి రాసుకుని కాసేపు అలాగే ఉంచాలి. ఆ తర్వాత చల్లటి నీళ్లతో ముఖాన్ని కడిగేసుకోవాలి. ఇలా చేస్తే చర్మం నునుపు దేలుతుంది.

* స్ట్రాబెర్రీ : డల్‌ స్కిన్‌కు స్ట్రాబెర్రీ ఫేస్‌ప్యాక్‌ చాలా మంచిది. స్ట్రాబెర్రీస్‌కు కొద్దిగా నీటిని జోడించి మిక్సీలో వేసి మెత్తగా పేస్టులా చేయాలి. ఆ గుజ్జును ముఖానికి రాసుకుని ఎండిపోయేదాకా అలాగే ఉంచుకోవాలి. మిక్స్డ్‌ ఫ్రూట్‌ ప్యాక్‌ కూడా రాసుకుంటే చర్మం మృదువుగా తయారవుతుంది.

* బొప్పాయి పండు : బాగా పండిన బొప్పాయి పండు గుజ్జును తీసి మెత్తగా చేసి దాన్ని ముఖానికి రాసుకుని 20 నిమిషాలపాటు అలాగే ఉంచుకోవాలి. ఆ తర్వాత చల్లటి నీళ్లతో ముఖాన్ని కడిగేసుకోవాలి.